گەننادي گولوۆكين قيىن كەزدەسۋدى نوكاۋتپەن اياقتاپ, تاعى ءبىر رەكوردتى قايتالادى
وتكەن سەنبىدەن جەكسەنبىگە قاراعان تاڭ الدىندا قازاقستاندىق گەننادي گولوۆكين بريتاندىق مارتين ميۋررەيمەن WBA جانە IBO ۆەرسيالارى بويىنشا ورتا سالماقتاعى الەم چەمپيوندىعى ءۇشىن كۇش سىناسىپ, 11-راۋندتا جەكپە-جەكتى تاعى دا نوكاۋتپەن اياقتادى. وسىلايشا, قاتارىنان 19 ۇرىستى مەرزىمىنەن بۇرىن بىتىرگەن ول اتاقتى مايك تايسوننىڭ بۇدان كوپ جىل بۇرىن جاساعان رەكوردىن قايتالادى.
ەۋروپانىڭ ءبىر مۇيىسىندەگى مونتە-كارلونىڭ Salle des Etoiles ارەناسىندا وتكەن «ۇلكەن بوكس كەشى» سول ساتتەردە تىكەلەي ەفير ارقىلى «قازاقستان» تەلەارناسىنان كورسەتىلدى. كەش استانا ۋاقىتى بويىنشا 01:25 ساعاتتا باستالدى. ال گولوۆكين مەن ميۋررەي 04:45 ساعاتتا رينگ تورىنە كوتەرىلدى.
ەسكە سالا كەتەتىن جايت, بۇل كۇنى ءبىر-بىرىمەن تۇيدەي قۇرداس ەكى بوكسشى دا 32-ءشى مارتە شارشى الاڭعا شىقتى. گولوۆكين وسىعان دەيىنگى 31 ۇرىسىنىڭ بارىندە جەڭىسكە جەتىپ, ولاردىڭ 28-ءىن نوكاۋتپەن اياقتاعان بولسا, سولاردىڭ دا 18-ىندە رينگتەن مەرزىمىنەن بۇرىن كەتكەن ەدى. ال ميۋررەي 29 جەكپە-جەگىندە جەڭىسكە جەتىپ, 1 رەت تەڭ تۇسكەن جانە 1 رەت ۇتىلعان بولاتىن. ءسويتىپ, گەننادي وسى شايقاستا ءوزىنىڭ ەكى بىردەي بولجام بويىنشا چەمپيوندىق اتاعىن قورعاپ قانا قويعان جوق, ول سونىمەن قاتار, اتاقتى مايك تايسوننىڭ ءبىر كەزدەرى بەلگىلەپ كەتكەن ەڭ بيىك كورسەتكىشى – قارسىلاسىن قاتارىنان 19 رەت نوكاۋتقا جىبەرۋ رەكوردىن دا قايتالاپ شىقتى. ەندى كەلەسى جەكپە-جەگىندە ءدال وسىلاي جەڭىسكە جەتەر بولسا, ناعىز بيىك دەڭگەي ءبىزدىڭ گولوۆكيننىڭ ەنشىسىنە جازىلعالى تۇر.
ءبىزدى قۋانتىپ وتىرعانى بوكس الەمىندە GGG دەگەن نىشاندى بەلگىگە يە بولعان گەنانىڭ كەزەكتى كەرەمەت جەڭىسى عانا ەمەس. جەڭىس ءوز الدىنا, ءبىزدىڭ باعلاننىڭ سودان كەيىنگى ءوزىن تاعى دا شىنايى قىرىنان تانىتا ءبىلۋى دە سۇيسىندىرمەي قويماس ەدى.
قازىر الەۋمەتتىك جەلىلەردە ءورىپ ءجۇر, وعان باسقا ەلدەردەگى مەنەدجەرلەر مەن جۋرناليستەر تاراپىنان بۇل جولى دا كوپتەگەن ۇسىنىستار ءتۇسىپ جاتتى. سولاردىڭ ءبىرى – رەسەيدىڭ وكىلدەرى ونى تاعى دا ءوز مەملەكەتتەرى اتىنان سايىسقا شىعۋعا كوندىرمەككە ارەكەت ەتتى. بىراق گەننادي ءوزىنىڭ باياعى ايتقان: «اكەم – ورىس جىگىتى, انام – كورەي قىزى, ال مەن – قازاقپىن» دەگەن سوزىنەن تانعان جوق.
ەندى جەكپە-جەكتىڭ وزىنە كەلەيىك. گولوۆكين ونىڭ باسىنان ميۋررەيگە باتىل شابۋىل جاساۋعا كوشتى. العاشقى سەكۋندتاردان ونىڭ شالت شابۋىلى مەن تولاسسىز تەگەۋرىنىنە تاپ كەلگەن قارسىلاسى ەكىنشى نومىرمەن ويناۋعا ءماجبۇر بولدى. كەزدەسۋدىڭ ءبىرىنشى راۋندى ءبىزدىڭ اتلەتتىڭ ازداعان باسىمدىلىعىمەن ءوتتى. كەلەسى كەزەڭدە دە وسى كورىنىس ساقتالىپ قالدى. بىراق, ۇدايى العا ۇمتىلىپ, باسەكەلەسىنىڭ وسال جەرلەرىن ءمۇشتىڭ كۇشىمەن مۇيىزدەپ تاۋىپ الۋعا بەيىل قويعان قازاقستاندىقتىڭ قارقىنى مەن قۋاتى بىرتىندەپ ارتىپ كەلە جاتقانى انىق بايقالىپ تۇردى. مۇنىڭ قارىمىن ميۋررەي ۋاقىت ۇزاعان سايىن ايقىن سەزىنە باستادى. سوندىقتان ونىڭ ۇرىس ۇستىندە كلينچكە بارۋى جيىلەدى. وسىلايشا گەنانىڭ تۋرا دا اۋىر سوققىلارىنان بوي تاسالاماقشى بولعان بريتانيالىق بوكسشىنىڭ قاۋقارى مەن قۋلىعىنىڭ قادامى ءتورتىنشى راۋندقا دەيىن عانا جەتتى. كەزەڭ اياقتالۋعا جاقىن قالعان ساتتە قارقىنعا قارقىن قوسقان گولوۆكين كەنەت قارسىلاسىن شىركوبەلەك اينالدىرىپ ءتۇسىردى. ارادا كوپ وتكەن جوق, قۇيىنداي قاۋىرت سوققى ميۋررەيدى تاعى دا جالپاسىنان ءتۇسىردى. ونى اقىرىنا دەيىن جەتكىزىپ, دىڭكەلەتىپ تاستاۋدان گونگ قانا امان الىپ قالدى. بەسىنشى راۋند تا گەنانىڭ وسىنداي باسىمدىلىعىمەن ءوتتى. دەگەنمەن, مارتين بۇل جولى كەزەكتى مارتە قۇلاپ قالماۋدىڭ امالىن جاساي ءبىلدى.
بريتانيا بوكسشىسى وسىدان كەيىن ەپتەپ ەسىن جيناپ العانداي بولدى. ول جەتىنشى راۋندتا ءتىپتى ءوزى دە بەلسەندى شابۋىلعا شىعۋعا تاۋەكەل جاسادى. بۇل, البەتتە, گەناعا ۇناعان جوق. سوندىقتان ۇرىستىڭ سەگىزىنشى بولىگىندە ول قارقىندى كۇرت ارتتىرىپ جىبەردى. كەلەسى ەكى راۋندتا دا وسى كورىنىس قايتالاندى. سونىڭ بارىندە قارسىلاسىن ۇرىپ تۇسىرەتىن ءبىر عانا سوققى جەتپەي جاتقانداي بولىپ كورىنىپ تۇردى. اقىرى ونىنشى راۋندتىڭ تۇگەسىلەر تۇسىندا ميۋررەي ۇشىپ ءتۇستى. نوكداۋن! بىراق شايقاس جالعاسار-جالعاسپاستان گونگ ءۇنى ەستىلدى. ال 11-راۋندتا گولوۆكيننىڭ قارشا بوراتقان سوققىلارىنان كەيىن ەسىنەن اۋىپ قالعان ادامنىڭ كەيپىن تانىتقان بريتانيالىقتىڭ الەمتاپىرىق ءتۇرىن كورگەن تورەشى جەكپە-جەكتى كىلت توقتاتتى. جەڭىس!
وسىلايشا گەننادي بيىلعى ماۋسىمداعى ءبىرىنشى ۇرىسىن دا جەڭىسپەن باستادى.
سەرىك ءپىرنازار,
«ەگەمەن قازاقستان».
