فوتو: gov.kz
17 جەلتوقسان كۇنى مەملەكەت باسشىسىنىڭ جارلىعىمەن ينۆەستورلاردىڭ قۇقىقتارىن قورعاۋ كوميتەتى قۇرىلىپ, ينۆەستيتسيالىق ومبۋدسمەن فۋنكتسيالارى باس پروكۋرورعا جۇكتەلگەن ەدى.
جاڭا كوميتەت ينۆەستيتسيالار جانە ينۆەستيتسيالىق قىزمەت سالاسىندا قاداعالاۋ جاساپ, ينۆەستورلاردىڭ قۇقىعىن قورعاۋ, ولاردىڭ بۇزىلۋىنىڭ الدىن الۋ جانە جولىن كەسۋ, قۇقىق بۇزۋشىلىقتارعا ىقپال ەتەتىن سەبەپتەر مەن جاعدايلاردى انىقتاۋ جانە جويۋ سىندى ماڭىزدى مىندەتتەردى جۇزەگە اسىرادى.
كەڭەستە ءسوز العان باس پروكۋرور بەرىك اسىلوۆ كوميتەت زاڭ بۇزۋشىلىقتار بولعاننان كەيىن جازالاۋ ىسىمەن ەمەس ولاردىڭ الدىن الۋ باعىتىندا قىزمەت ەتۋگە ءتيىس ەكەنىن باسا ايتتى.
«قاداعالاۋ شارالارى نىسانالى ءارى الدىن الۋ سيپاتىندا بولۋى ءتيىس. ءبىزدىڭ مىندەتىمىز جازالاۋ ەمەس, زاڭسىز شەشىمدەردىڭ الدىن الىپ, ادىلەتتىلىكتى ۋاقتىلى قالپىنا كەلتىرۋ», دەدى باس پروكۋرور.
وسى باعىتتاعى جۇمىستاردى ءتيىمدى اتقارۋ ءۇشىن «پروكۋرورلىق سۇزگى» تەتىگى ەنگىزىلىپ وتىر. اتالعان تەتىك ەنگىزىلگەن ساتتەن باستاپ پروكۋرورلار 1100 شەشىمگە قارسىلىق تانىتىپ, 400 تەكسەرۋ, 480 اكىمشىلىك ءىس جۇرگىزۋ جانە 210 وزگە دە شەكتەۋ شارالارىنىڭ الدىن الدى. ناتيجەسىندە ازاماتتىق داۋلاردىڭ سانى – 32%-عا, ال ينۆەستورلاردىڭ سوتقا جۇگىنۋى – 33%-عا قىسقارعان.
قازىر باس پروكۋراتۋرا مەن سىرتقى ىستەر مينيسترلىگى بىرلەسىپ ءىرى حالىقارالىق جانە جوعارى تەحنولوگيالىق ينۆەستورلاردى قولداۋعا باعىتتالعان «جاسىل ءدالىز» تەتىگىن ىسكە اسىرىپ جاتىر. بۇل تەتىككە 137 ينۆەستيتسيالىق جوبا ەنگىزىلىپ, ولار بويىنشا 16 مەملەكەتتىك قىزمەت كورسەتۋ مەرزىمى 5 جۇمىس كۇنىنە دەيىن قىسقارتىلعان.
ەلىمىزدە تۋريزم سالاسىنا تارتىلعان ينۆەستيتسيا كولەمى ءوستى.
بۇگىندە پروكۋرورلار جالپى قۇنى 76 ترلن تەڭگەنى قۇرايتىن 1 790 ينۆەستيتسيالىق جوبانى سۇيەمەلدەۋدە. جالپى سوماسى 23 ترلن تەڭگە بولاتىن جوبالاردى ىسكە اسىرىپ جاتقان شامامەن 2 مىڭ ينۆەستورعا ناقتى قۇقىقتىق كومەك كورسەتىلگەن. پروكۋرورلىق قاداعالاۋ شارالارىنىڭ ناتيجەسىندە كاسىپكەرلەردىڭ اكىمشىلىك كەدەرگىلەر مەن نەگىزسىز سوزبالاڭعا تاپ بولۋىنا قاتىستى 145 پروبلەمالىق ماسەلە شەشىلگەن. ينۆەستورلاردىڭ وتىنىشتەرىن قاراۋ كەزىندە ۋاقىتتى سوزىپ كەدەرگى كەلتىرگەن 326 لاۋازىمدى تۇلعا جاۋاپكەرشىلىككە تارتىلعان.
