اپاتتى تەرگەپ-تەكسەرۋ جۇمىسىنىڭ كوميسسياسىنا ازەربايجان, رەسەي, برازيليا ۋاكىلەتتى وكىل بولىپ, حالىقارالىق ازاماتتىق اۆياتسيا ۇيىمىنىڭ (يكاو) باقىلاۋشىسى مۇشەلىك ەتىپ وتىر.
وقيعاعا قاتىستى الدىن الا تەرگەۋ قورىتىندىسى بۇعان دەيىن 4 اقپان كۇنى جاريالانعان.
تەرگەۋ بارىسىندا اۋە ديسپەتچەرلەرىنىڭ, ۇشۋعا دايىندىق, ونى ورىنداۋعا ارنالعان قۇجاتتار مەن مەتەورولوگيالىق اقپارات پەن تەحنيكالىق قىزمەت كورسەتۋ ماتەريالدارى تالدانعان. سونداي-اق ۇشۋ دەرەكتەرىن تىركەيتىن قۇرىلعى مەن وزگە دە ماڭىزدى قىزمەتتەردىڭ ورىندالۋ بارىسىنا قاتىستى مالىمەت الىنعان.
«تەرگەۋ كەزىندە انىقتالعان بوگدە مەتالل زاتتارعا (سىرتقى وبەكتىلەر) كەشەندى (تراسولوگيالىق, بالليستيكالىق, جارىلىس-تەحنيكالىق جانە ءورت) ساراپتاما جۇرگىزىلدى. ساراپتاما ناتيجەلەرى بويىنشا جارىلعىش زاتتاردىڭ ىزدەرى تابىلعان. زەرتتەۋگە ۇسىنىلعان ءۇش وتتەگى باللونىندا جارىلىس ىزدەرى جوق. №2 گيدراۆليكالىق جۇيە تۇتىگىنىڭ ءبىر بولىگىنە تراسولوگيالىق ساراپتاما جۇرگىزىلدى. زەرتتەۋ ناتيجەلەرى بويىنشا تۇتىكتە زاقىم بار ەكەندىگى انىقتالدى», دەلىنگەن كولىك مينيسترلىگىنىڭ حابارلاماسىندا.
اپاتقا اسكەري قاقتىعىس ارەكەتتەرى سەبەپ بولدى ما؟
كوميسسيانىڭ ەكىنشى توبى قاقتىعىس ايماعىنان ۇشۋ كەزىندەگى تاۋەكەلدەردى زەرتتەۋگە دەن قويعان. بۇگىندە كوميسسيا رەسەي جانە ازەربايجان اۆياتسيالىق بيلىگى, «Azerbaijan Airlines» اۋەكومپانياسى ۇسىنعان ىقتيمال بولجامدارعا تالداۋ جۇرگىزىپ جاتىر. مينيسترلىك مالىمەتىنشە, تەرگەۋدىڭ وسى بولىگىندە ۇشۋ قاۋىپسىزدىگىن قامتاماسىز ەتۋ كەزىندە ازاماتتىق جانە اسكەري سەكتورلاردىڭ ءوزارا ءىس-قيمىلى ماسەلەلەرى دە قاراستىرىلىپ جاتىر.
«قازىر تەرگەپ-تەكسەرۋ جونىندەگى كوميسسيا تەحنيكالىق قىزمەت كورسەتۋدىڭ ورتالىق كومپيۋتەرىنىڭ (Central Maintenance Computer) كاسسەتاسىن زەرتتەۋ جۇمىستارىنىڭ اياقتالۋىن, سونداي-اق قاقتىعىس ايماقتارىنىڭ ۇستىنەن نەمەسە ولاردىڭ ماڭىندا ۇشۋدى ورىنداۋ كەزىندەگى تاۋەكەلدەردى باعالاۋ تالداۋى بويىنشا جۇمىس توبىنىڭ ەسەبىن كۇتىپ وتىر», دەلىنگەن مينيسترلىكتىڭ الدىن الا تەكسەرۋ ناتيجەلەرى جاريالانعان قۇجاتتا.
قايعىلى وقيعادان كەيىن مەملەكەت باسشىسى قاسىم-جومارت توقاەۆ قازاقستان ۇشاق اپاتىن زەرتتەۋگە بار كۇش-جىگەرىن سالاتىنىن مالىمدەگەن.
ەسكە سالايىق, قازا تاپقانداردىڭ اراسىندا 3 ەكيپاج مۇشەسى بولعان. اپاتتان امان قالعان ازاماتتار جەرگىلىكتى اۋرۋحانادا ەم الدى.
ەلىمىزدىڭ قۇزىرلى ورگاندارى اپاتتان قازا تاپقان وزگە شەتەل ازاماتتارىنىڭ ءمايىتىن ەلىنە جەتكىزۋ ىسىنە بەلسەندى قاتىستى.
پرەزيدەنت ۇشاق اپاتى كەزىندە كومەكتەسكەن ءاربىر جانعا العىس ايتىپ, 10 قۇتقارۋشىعا مەملەكەتتىك ناگرادا تابىستالعان بولاتىن.
