تۇرعىنداردىڭ ايتۋىنشا, پروتوزانوۆ كوشەسى, №31 ءۇيدىڭ ءبىرىنشى پودەزىندەگى دوموفونى بار كىرەبەرىس ەسىك ءبىر اي بويى ادامداردى توكپەن سوعىپ كەلگەن. الايدا ماسەلە ءتيىستى ورىندار تاراپىنان شەشىلمەي, سونىڭ سالدارىنان قايعىلى جاعداي ورىن العان.
«25 جەلتوقساندا ۇلكەن قايعىلى جاعداي بولدى. جىگىتتى توك قاتتى سوققانى سونشا, ول ۇشىپ كەتتى. ءبىز بىردەن جەدەل جاردەم شاقىردىق. دارىگەرلەر كەلگەن سوڭ رەانيماتسيالىق شارالار جۇرگىزدى, جۇرەگى توقتاپ قالعان. جىگىتتى اۋرۋحاناعا الىپ كەتتى, قازىر جانساقتاۋ بولىمىندە.
بۇعان كىم جاۋاپ بەرەدى؟ نەگە ەشكىم ەشتەڭە ىستەمەدى, اپات بولعانشا كۇتتى مە؟ ءبىزدىڭ پودەزدە كوپ قارت ادامدار تۇرادى, ەگەر تاعى بىرەۋدى توك ۇرسا, سوڭى وتە اۋىر بولۋى مۇمكىن», دەيدى پودەزد تۇرعىندارى.
وقيعا تۋرالى اقپارات قالا اكىمدىگىنە جەتكىزىلدى. ەلەكتر توگىنىڭ اعىپ كەتۋ سەبەپتەرىن انىقتاۋ ءۇشىن وقيعا ورنىنا «يستوك» كوپپاتەرلى تۇرعىن ءۇيدى باسقارۋ, كۇتىپ-ۇستاۋ قىزمەتكەرلەرى شاقىرىلدى.
«ەلەكتر توگىمەن زاقىمدانۋ فاكتىسى تىركەلدى. الدىن الا دەرەك بويىنشا, توك كوزى «الما دوموفون» جشس قىزمەت كورسەتەتىن ۇيىمعا تيەسىلى بولۋى مۇمكىن. وقيعا ورنىنا تۇرعىن ءۇي قاتىناستارى ءبولىمى كەلدى. قاجەتتى تەكسەرۋ جانە قالپىنا كەلتىرۋ جۇمىستارى جۇرگىزىلدى.
سونداي-اق ازاماتتاردىڭ ءومىرى مەن دەنساۋلىعىنا تونەتىن قاۋىپتىڭ الدىن الۋ ماقساتىندا زاقىم كەلتىرگەن نىسان ەلەكتر جەلىسىنەن اجىراتىلدى», دەپ ءتۇسىندىردى وسكەمەن قالاسىنىڭ اكىمدىگى.
كەيىنىرەك ەلەكتر توگىنىڭ اعىپ كەتۋىنە ەسىك ماڭىندا ورناتىلعان پروجەكتور شامى سەبەپ بولۋى مۇمكىن ەكەنى حابارلاندى. ول اجىراتىلىپ, قاۋىپ جويىلدى. وقيعاعا قاتىستى جاۋاپكەرشىلىكتى ءتيىستى ورگاندار انىقتايتىن بولادى.
