استانا. 11 مامىر. اتى اڭىزعا اينالعان روك-ءانشى, مارقۇم ۆيكتور تسويدىڭ اكەسىنىڭ راك اۋرۋىنا شالدىققانى بەلگىلى بولدى. بۇل تۋرالى «كومسومولسكايا پراۆدا» حابارلادى.
دارىگەرلەر 77 جاستاعى روبەرت تسويدىڭ اعزاسىنان ادەپكى كەزەڭدەگى ونكولوگيا اۋرۋىن تاپتى. قازىر روبەرت ماكسيموۆيچ ءيزرايلدىڭ كلينيكاسىندا. مۇندا ول ءساۋىردىڭ سوڭىنان بەرى حيميتەراپيادان ءوتىپ جاتىر. مۋزىكانتتىڭ اكەسىنە 11 مامىر كۇنى كۇردەلى وپەراتسيا جاساۋ بەلگىلەنگەن ەكەن. ونىڭ قالاي وتكەنى كەيىنىرەك بەلگىلى بولادى.
«ۆيكتور تسويدى ەسكە الۋ» قورىنان حابارلانعانداي, روبەرت ماكسموۆيچتىڭ ءوزى تۇراتىن پەتەربۋرگ قالاسىندا ەمدەلۋى مۇمكىن بولماعان. سەبەبى, ءپروفيلدى كلينيكاعا تەك جارتى جىلدان كەيىن عانا جاتۋ مۇمكىن بولعان. ال كەلەسى كلينيكاداعىلار «مەرەكەلەردەن كەيىن كەلۋ» كەرەكتىگىن ايتقان.
روبەرت تسويدىڭ ەمدەلۋ ءۇشىن تولەيتىن 1,8 ملن. ءرۋبلى بولماعان. مۋزىكانتتىڭ وتباسىندا مۇنداي اقشا جوق ەكەن. سوسىن ايەلى مارينا حان امالسىزدان ۆيكتور تسوي اتىنداعى قوردان جاردەم سۇراپتى. ولار وسىعان وراي ارنايى ەسەپشوت اشىپتى. بىراق اپتا ىشىندە ۆيكتوردىڭ تابىنۋشىلارى تەك 100 مىڭ رۋبل عانا قارجى جيناي الىپتى.
ءبىرىنشى بولىپ كومەككە ۆيكتور تسوي تۇسكەن «ينە» ءفيلمىنىڭ رەجيسسەرى راشيد نۋگمانوۆ كەلگەن. ول ءوزىنىڭ سايتىنا اقشا جينالاتىنى تۋرالى اقپار ورنالاستىرعان. سودان باستاپ ەسەپشوتقا اقشا تۇسە باستاعان.
جەتپەيتىن قالعان قوماقتى اقشانى روبەرت ماكسيموۆيچتىڭ جۇبايى تانىستارىنان قارىزعا العان. تاڭ قالارلىق نارسە, مۋزىكانتتىڭ تابىنۋشىلارى مەن وتباسىنىڭ دوستارىنان بولەك, بۇلارعا جاردەم بەرەتىن ەشكىم بولماعان.
«نەمەرەم بۇل حاباردى سالقىن قابىلدادى, - دەپ جازادى «ۆيكتور تسويدى ەسكە الۋ» قورىنىڭ نەگىزىن قالاۋشى سۆەتلانا ۆلاسوۆا. – وعان, مەنىڭ ءوتىنىشىم بويىنشا, ۆيتاليك كالگين («ۆيكتور تسوي» كىتابىنىڭ اۆتورى – رەداكتسيا) ايتتى».
«ۆالەنتينا ۆاسيلەۆنامەن (ۆيكتور تسويدىڭ اناسى – رەداكتسيا) دا وسىلاي بولعان. ول نەمەرەسىمەن قاتىسپاعان كۇيى كەتتى (2009 جىلى قايتىس بولعان – رەداكتسيا)», - دەگەندى قوستى قوردىڭ جەتەكشىسى.
روبەرت ماكسيموۆيچ «كومسومولكاعا» بەرگەن ءبىر سۇحباتىندا ۇلىنىڭ قايتىس بولعاننان كەيىن دە ءوزىن اسىراپ وتىرعانىن ايتقان ەكەن. ول ۆيكتوردىڭ ديسكىلەرى مەن اتريبۋتيكاسىن ساتۋدان جاقسى قالاماقىنى الىپ تۇرعان. الايدا, بايقاپ قاراعاندا, بۇل تابىستىڭ ءوزى وپەراتسيا شىعىنىن جابا الاتىنداي بولماعان سياقتى.
وپەراتسيادان كەيىن روبەرت ماكسيموۆيچتى يزرايلدە ساۋلە الۋ كۋرسى مەن رەابليتاتسيادان ءوتۋ كۇتىپ تۇر. سوندىقتان قارجى جيناۋ پروتسەسى ءالى توقتاماعان كورىنەدى.
ۆيكتوردىڭ اناسى جۇرەگىنە وپەراتسيا جاساۋعا ەكى كۇن جەتپەي قالىپتى.
روبەرت تسوي – قازاقستاننىڭ تۋماسى. دالىرەگى, قيىر شىعىستان كەلگەننەن كەيىن قىزىلوردا قالاسىندا تۇرعان, وسىندا جۇمىس ىستەگەن, كەيىن ۆيكتوردىڭ سوڭىنان پەتەربۋرگكە كوشىپ كەلەدى.
قايرات ق ۇلىمبەت.
دەرەك, سۋرەت: كومسومولسكايا پراۆدا.
