ينفوگرافيكانى جاساعان – زاۋرەش سماعۇل ,«EQ»
ەۋرازيالىق ينتەگراتسيا ينستيتۋتىنىڭ عىلىمي-تەوريالىق تالداۋ جانە ادىستەمەلىك قامتاماسىز ەتۋ دەپارتامەنتىنىڭ مەڭگەرۋشىسى ارمان ەشمۇراتوۆتىڭ ايتۋىنشا, ينستيتۋت سونداي-اق ازاماتتاردىڭ ەلدىڭ قوعامدىق-ساياسي كۇن تارتىبىنە, باق-تى تۇتىنۋ ارنالارىنا, اقپارات كوزدەرىنە سەنىم دەڭگەيىنە, ولاردىڭ قوعامدىق-ساياسي جانە ەكونوميكالىق جاعدايعا بەرگەن باعاسىنا, مەملەكەت باسشىسىنىڭ رەيتينگى مەن قىزمەتىنە دە زەرتتەۋ جۇرگىزگەن.
ساۋالناماعا قاتىسقانداردىڭ 78,5 پايىزى كەيىنگى ءۇش ايدا پرەزيدەنتتىڭ جۇمىسى ءتيىمدى بولعانىن اتاپ وتكەن. ال «ەگەر جاقىن ارالىقتا پرەزيدەنت سايلاۋى بولا قالسا, قاسىم-جومارت توقاەۆتىڭ كانديداتۋراسىنا داۋىس بەرەسىز بە؟» دەگەن ساۋالعا قاتىسۋشىلاردىڭ 77,3 پايىزى ء«يا» دەپ جاۋاپ بەرگەن. 71,5 پايىزى الداعى ۋاقىتتا ەلدە جاقسى وزگەرىستەر بولاتىنىنا سەنىم بىلدىرگەن.
ەلدەگى ساياسي پارتيالاردىڭ ىشىنەن «Amanat» پارتياسىن 62,4 پايىز قاتىسۋشى اتاپ وتكەن. ودان سوڭ حالىق «اق جول» (29,7 پايىز) مەن «اۋىل» (29,3 پايىز) پارتيالارىمەن جاقسى تانىس. ال رەسپوندەنتتەردىڭ 17 پايىزى قازاقستان حالىق پارتياسىن, 15,1 پايىزى «Respublica» پارتياسىن, 11,7 پايىزى «بايتاق» پارتياسىن بىلەتىنىن ايتقان. جالپىۇلتتىق سوتسيال-دەموكراتيالىق پارتياسىن قاتىسۋشىلاردىڭ 10,3 پايىزى عانا بەلگىلەگەن.
«ساۋالنامانى ءبىز وسى جىلدىڭ 1-10 قاراشا ارالىعىندا جۇرگىزدىك. 17 اۋدان مەن رەسپۋبليكالىق ماڭىزى بار 3 قالانىڭ 18 جاستان اسقان 1 467 ازاماتى قاتىستى. ولار – قالا مەن اۋىل تۇرعىندارى. جالپى زەرتتەۋگە قاتىسۋشىلاردىڭ 52 پايىزى ەلدىڭ ساياسي, ەكونوميكالىق جاعدايىن قاداعالاپ وتىراتىنىن ايتادى», دەيدى ا.ەشمۇراتوۆ.
زەرتتەۋگە سۇيەنسەك, ەلدەگى جاڭالىقتاردى تۇرعىنداردىڭ باسىم بولىگى (52,7 پايىز) تەلەديداردان كورەدى. بۇدان سوڭ الەۋمەتتىك جەلىلەردەگى (Instagram – 51,2 پايىز, TikTok – 39,7 پايىز, YouTube – 26,7 پايىز) اقپاراتتارعا كوز جۇگىرتەدى. سونداي-اق رەسپوندەنتتەردىڭ 33,5 پايىزى WhatsApp مەسسەندجەرى ارقىلى, 29,7 پايىزى ينتەرنەت رەسۋرستارى مەن اقپاراتتىق اگەنتتىكتەردىڭ جاڭالىقتارىن قارايدى. ال ولاردىڭ 19,4 پايىزى جاڭالىقتاردى وتباسى مۇشەلەرى مەن تۋىستارىنان, 18,7 پايىزى ارىپتەس, دوس, كورشىلەرىنەن ەستيتىنىن ايتادى. دەسە دە, حالىق مەملەكەتتىك باق-قا سەنىم بىلدىرگەن. زەرتتەۋ تۇرعىنداردىڭ اقپاراتتىق ينتەرنەت-پورتالدارىنا سەنە بەرمەيتىنىن كورسەتتى.
وبلىستارداعى قوعامدىق-ساياسي, ەكونوميكالىق جاعدايدى قاتىسۋشىلار تۇراقتى دەپ باعالاعان. وسىلايشا 66 پايىز رەسپوندەنت ەل دۇرىس باعىتتا دامىپ جاتقانىن ايتقان.
