قاراعاندىدا مەكتەپ اۋلاسىنان ايەلدىڭ بولشەكتەلگەن دەنەسى تابىلدى

قاراعاندى. 11 مامىر. قاراعاندىدا جان تۇرشىگەرلىك ادام ءولىمى بولدى. مامىردىڭ 9-ى كۇنى قالاداعى مەكتەپتەردىڭ ءبىرىنىڭ اۋلاسىنان بولشەكتەنىپ تاستالعان جاس كەلىنشەكتىڭ دەنەسى سالىنعان شابادان تابىلدى. بۇل تۋرالى «نوۆىي ۆەستنيك» حابارلادى. قۇقىق قورعاۋ ورگاندارىنىڭ قىزمەتكەرلەرى بۇلايشا ءجانتاسىلىم ەتكەن ايەلدىڭ كىم ەكەنىن تەز تاپتى. ول قالانىڭ 25 جاستاعى تۇرعىن اياۋلى سۇلەيمەنوۆا بولىپ شىقتى. مۇنىڭ الدىندا, 6 مامىر كۇنى تۋعان-تۋىستارى الەۋمەتتىك جەلى ارقىلى ونىڭ جوعالىپ كەتكەنى تۋرالى حابارلاپ, كومەكت كورسەتۋدى سۇراعان ەكەن. «تۋىس قىزىمىز جوعالىپ كەتتى. ونى بىرەۋلەردىڭ قاماۋدا ۇستاپ وتىرعانى جونىندە مالىمەت بار. بىراق ونىڭ قازىر قاي جاقتا ەكەنىن جانە نە ءۇشىن ۇستاپ وتىرعاندارىن بىلمەيمىز. بىزگە كومەككە كەلە الاتىن ەرىكتى كىسىلەر كەرەك. كولىگى بولسا ءتىپتى جاقسى, ىزدەۋگە قاتىستى كەز كەلگەن جاردەمدى قابىلدايمىز», - دەلىنگەن WhatsApp جەلىسىمەن تاراتىلعان حابارلامادا. كەلىنشەكتى وزىمەن بىرگە پاتەر جالداپ تۇرعان جىگىت 1995 جىلعى ە.ا.تراەۆ ەسىمدى جىگىت سوڭعى رەت تىرىدەي كورگەن دەلىنىپ وتىر. قۇقىق قورعاۋ ورگاندارى قىزمەتكەرلەرىنىڭ بولجامدارى بويىنشا, مارقۇمنىڭ ولىمىنە سەبەپشى بولعان دا سول بولۋى مۇمكىن. ال ولگەن قىزدىڭ تۋىستارى ونى اياۋلىنىڭ ولىمىنە قاتىسى بار دەپ سانايدى. باسىلىمنىڭ حابارلاۋىنشا, سۇلەيمەنوۆانىڭ پاتەرىنەن ءوزىنىڭ پايىزدىق ۇستەمەمەن قارىزعا اقشا العان ادامدارىنىڭ ءتىزىمى تابىلدى. قازىر قىلمىستىق ءىستىڭ ءمان-جايى انىقتالىپ جاتىر. كەيبىر اقپارلارعا قاراعاندا, اياۋلىنىڭ ارتىندا كىشكەنتاي ۇلى قالعان. ايقىن نەسىپباي. دەرەك, سۋرەت: نوۆىي ۆەستنيك.