مەسسەندجەردى ازىرلەۋشىلەردىڭ ايتۋىنشا, رەسەي بيلىگى WhatsApp قىزمەتىن شەكتەۋگە كىرىسكەن.
«WhatsApp-قا قولجەتىمدىلىكتى شەكتەۋ ارقىلى رەسەي ۇكىمەتى 100 ميلليوننان استام ادامدى جەكە سويلەسۋ قۇقىعىنان ايىرۋعا تىرىسۋدا. بۇل قادام مەرەكە قارساڭىندا جاسالىپ وتىر», دەدى كومپانيا وكىلى حالىقارالىق Reuters اگەنتتىگىنە 23 جەلتوقساندا.
ونىڭ ايتۋىنشا, قوسىمشا رەسەيدىڭ ءاربىر ايماعىندا ادامداردىڭ كۇندەلىكتى ومىرىنە تەرەڭ ەنگەن: اتا-انالار چاتىنان باستاپ, جۇمىس توپتارىنا, دوستارمەن, كورشىلەرمەن جانە تۋىستارمەن بايلانىسقا دەيىن.
ء«بىز قولدانۋشىلارىمىزدى قورعاۋعا مىندەتتىمىز. سەبەبى ادامداردى مەملەكەت ۇسىنعان, قاۋىپسىزدىگى تومەن قوسىمشالاردى پايدالانۋعا ماجبۇرلەۋ ولاردىڭ جەكە قاۋىپسىزدىگىن السىرەتەدى», دەپ قوستى وكىل.
رەسەيدە WhatsApp جۇمىسى تامىز ايىنان بەرى جۇيەلى تۇردە بۇعاتتالىپ كەلەدى. سول كەزدە-اق كوپتەگەن قولدانۋشىلار ءۇشىن قوڭىراۋ شالۋ مۇمكىندىگى جابىلعان ەدى.
28 قاراشادا رەسەيدىڭ بايلانىس سالاسىن قاداعالايتىن ورگان – روسكومنادزور ەگەر كومپانيا رەسەيلىك زاڭ تالاپتارىن ورىنداماسا, ياعني قۇقىق قورعاۋ ورگاندارىمەن ىنتىماقتاسپاسا, مەسسەندجەردى تولىق بۇعاتتايتىنىن ەسكەرتتى.
22 جەلتوقساننان باستاپ رەسەيلىك قولدانۋشىلار قوسىمشادا اقاۋلارعا شاعىمداندى. ربك دەرەككوزىنە سۇيەنسەك, روسكومنادزور WhatsApp جۇمىسىن 70–80% دەڭگەيىندە ادەيى باياۋلاتقان.
