جيندا ءوڭىردىڭ 10 اۋدانى مەن 10 اۋىلىنا سالتاناتتى تۇردە JINMA 904A ماركالى 20 جاڭا تراكتوردىڭ كىلتى بەرىلدى.
بايقاۋ ۇزدىكتەرى «تازا قازاقستان» باعدارلاماسى اياسىندا ينتەرنەتپەن قامتۋ, اباتتاندىرۋ مەن كوگالداندىرۋدا كرەاتيۆتى ءادىس قولدانۋ, تۇرمىستىق قالدىقتاردى تازالاۋ, حالىقتىڭ الەۋمەتتىك جاعدايىن جاقسارتۋ, ينفراقۇرىلىمدى, ءتۋريزمدى, ساياباقتار مەن جاسىل جەلەكتەردى دامىتۋ, ۇلگىلى اۋىل, ءتارتىپ پەن زاڭدى, مادەني مۇرانى ساقتاۋ, ەلدى مەكەندەر اراسىنداعى جولداردىڭ ساپاسى جاقسارتۋ, سەنبىلىك وتكىزۋ, حالىقتى ەكولوگيالىق ءىس-شارالارعا بەلسەندى تارتۋ, ماڭىزدى نىساندارمەن قامتاماسىز ەتۋ, ينۆەستيتسيا تارتۋ, ەكونوميكالىق الەۋەتتى نىعايتۋ, قوعامدىق ورىنداردىڭ تازالىعى, مەتسەناتتارمەن بەلسەندى جۇمىس باعىتتارىندا 20-عا جۋىق نوميناتسيا انىقتالدى.
سالتاناتتى جيىنعا قاتۆسقان ايماق باسشىسى تازالىق مادەنيەتىن قالىپتاستىرۋ ءار تۇرعىننىڭ جاۋاپكەرشىلىگى ەكەنىن ايتتى.
«ايماق ەكونوميكاسى, ونەرى مەن مادەنيەتى, ەكولوگياسى مەن تازالىعى – بارشامىزعا ورتاق. ال تازالىق دەگەنىمىز – جىلىنا ءبىر رەت سەنبىلىككە قاتىسۋ ەمەس, بۇل – ءبىزدىڭ وڭىردە قالىپتاسۋى ءتيىس ۇلكەن مادەنيەت. مەملەكەت باسشىسى قاسىم-جومارت توقاەۆ بۇل جونىندە «قالالار مەن اۋىلداردىڭ ساۋلەتتى, ساياباقتار مەن اۋلانىڭ تازا بولۋى, ەڭ الدىمەن, باسقاعا ەمەس, وزىمىزگە كەرەك», دەپ ايرىقشا اتاپ وتكەن بولاتىن. تۋعان جەرىمىزدىڭ تۇلەگەنى, تۇرعان ورتامىزدىڭ كىرشىكسىز بولعانى, ەڭ الدىمەن, وزىمىزگە كەرەك. وبلىسىمىزدىڭ تازالىعى – اكىمدىك پەن كوممۋنالدىق قىزمەتتىڭ عانا ەمەس, ءاربىر ازاماتتىڭ, ءاربىر وتباسىنىڭ جاۋاپكەرشىلىگى. بۇگىنگى ماراپات – سىزدەردىڭ بىرلىكتەرىڭىز بەن ەڭبەكقورلىقتارىڭىزدىڭ جەمىسى. سىزدەر ءوز اۋىلدارىڭىزدى اباتتاندىرىپ, كوگالداندىرۋ ارقىلى وزگەلەرگە ۇلگى كورسەتتىڭىزدەر. بايقاۋعا قاتىسىپ, بەلسەندىلىك تانىتقان ەلدى مەكەندەرگە 20 جاڭا تراكتوردىڭ كىلتىن تابىستاپ وتىرمىز. تەحنيكالار اۋىلدارىڭىزدىڭ گۇلدەنىپ, تازا ءارى جايلى بولۋىنا قىزمەت ەتەدى دەپ سەنەمىن. بۇل بايقاۋدى داستۇرگە اينالدىرىپ, كەلەسى جىلى دا جالعاستىرامىز. تازالىق اكتسياسىنا قاتىسقان قاراپايىم ازاماتتاردى نازاردان تىس قالدىرماي, ماراپاتتايتىن بولامىز», دەدى وبلىس اكىمى.
ەستەرىڭىزدە بولسا وبلىس اكىمى جىل باسىندا ءوڭىر تۇرعىندارىنا ارنايى بەينەۇندەۋ جاساپ, جالپىوڭىرلىك سەنبىلىككە بەلسەندى قاتىسۋعا شاقىرىپ, جىل سوڭىندا ارنايى بايقاۋ وتكىزىلىپ, جەڭىمپازدار انىقتالاتىنىن ايتقان ەدى.
وبلىستىق ءباسپاسوز قىزمەتىنىڭ مالىمەتىنشە, بيىل وڭىردە «تازا قازاقستان» باعدارلاماسى اياسىندا اۋقىمدى جۇمىس اتقارىلدى. تازالىق ناۋقاندارىنا 349 مىڭنان استام تۇرعىن اتسالىسىپ, 52 مىڭ توننا قالدىق شىعارىلدى. كوگالداندىرۋ جۇمىستارىنىڭ ناتيجەسىندە 70 مىڭنان استام كوشەت ەگىلدى. عارىشتىق مونيتورينگ ارقىلى انىقتالعان 191 رۇقسات ەتىلمەگەن قوقىس ورىندارى جويىلدى.
