قازاقستاندا بالالاردىڭ قۇقىقتارىن قورعاۋ جۇيەسىن كۇشەيتۋ باعىتىندا جاڭا ينستيتۋتسيونالدىق قادام جاسالۋدا. اتاپ ايتقاندا, وبلىس اكىمدىكتەرى جانىنان بالا قۇقىقتارىن قورعاۋ جونىندەگى دەربەس باسقارمالار قۇرۋ جۇمىستارى قولعا الىندى. بۇل قۇرىلىمدار وڭىرلىك دەڭگەيدە بالالاردىڭ قاۋىپسىزدىگىنە, قۇقىقتارىنىڭ ساقتالۋىنا جانە الدىن الۋ شارالارىنىڭ ءتيىمدى ىسكە اسۋىنا تىكەلەي جاۋاپتى بولادى.
سوڭعى جىلدارى بالالارعا قاتىستى زورلىق-زومبىلىق, سۋيتسيد جانە جاسوسپىرىمدەر اراسىنداعى قۇقىقبۇزۋشىلىق ماسەلەسى ەرەكشە الاڭداۋشىلىق تۋعىزىپ وتىر. وسىعان بايلانىستى بالالاردىڭ قۇقىقتارىن قورعاۋ سالاسىندا زاڭنامالىق جانە ۇيىمداستىرۋشىلىق وزگەرىستەر جۇزەگە اسىرىلۋدا. بالا قۇقىقتارى جونىندەگى ۋاكىلدىڭ باستاماسىمەن سوڭعى ەكى جىلدا قولدانىستاعى زاڭناماعا 120 تۇزەتۋ ەنگىزىلدى. بۇل نورمالار بالانىڭ مۇددەسىن قورعاۋ تەتىكتەرىن كۇشەيتىپ, مەملەكەتتىك ورگانداردىڭ جاۋاپكەرشىلىگىن ارتتىرۋدى كوزدەيدى.
2025 جىلى ەلىمىزدىڭ 13 ءوڭىرى مەن 73 ەلدى مەكەنىندە بالالاردىڭ جاعدايىنا مونيتورينگ جۇرگىزىلدى. ونىڭ اياسىندا 272 مەكەمەدە بالالار اراسىندا جاسىرىن ساۋالناما الىنىپ, 173 وتباسىدا تاربيەلەنىپ جاتقان جەتكىنشەكتەردىڭ تۇرمىس-تىرشىلىگى زەردەلەندى. تەكسەرۋ ناتيجەسىندە بالا قۇقىقتارىن قورعاۋ سالاسىنداعى زاڭ تالاپتارىن بۇزۋدىڭ 171 دەرەگى انىقتالعان.
دينارا زاكيەۆانىڭ ايتۋىنشا, جۇرگىزىلگەن مونيتورينگ وڭىرلەردە بالالاردىڭ قۇقىقتارىن قورعاۋ ىسىندە باسقارۋشىلىق دەڭگەيدە جۇيەلى ۇيلەستىرۋدىڭ قاجەت ەكەنىن كورسەتكەن.
— بالالارعا قاتىستى ماسەلەلەر كوبىنە جەرگىلىكتى دەڭگەيدە تۋىندايدى. سوندىقتان وڭىرلەردە دەربەس باسقارما قۇرۋ بالالاردىڭ قۇقىقتارىن قورعاۋ بويىنشا جەدەل ءارى ناقتى شەشىم قابىلداۋعا مۇمكىندىك بەرەدى, — دەدى ۋاكىل.
قازىرگى تاڭدا ايماقتاردا تۇرمىستىق زورلىق-زومبىلىقتىڭ الدىن الۋ جانە وتباسىلارعا قولداۋ كورسەتۋ ماقساتىندا اشىلعان 112 وتباسىلىق قولداۋ ورتالىعى جۇمىس ىستەپ تۇر. الايدا سالاداعى احۋال بۇل جۇمىستى ورتالىقتاندىرىلعان تۇردە باسقارۋ قاجەتتىگىن كورسەتتى.
سونىمەن قاتار ەرەكشە قاجەتتىلىكتەرى بار بالالاردى قولداۋ باعىتى دا كەڭەيتىلىپ جاتىر. قازىرگى ۋاقىتتا «قازاقستان حالقىنا» قورى سەرىكتەستەرىمەن بىرلەسىپ 49 وڭالتۋ ورتالىعىن ىسكە قوستى. بۇل مەكەمەلەردە دامۋىندا ەرەكشەلىگى بار بالالارعا مەديتسينالىق, الەۋمەتتىك جانە پەداگوگيكالىق قىزمەتتەر كورسەتىلەدى.
الداعى كەزەڭدە «قازاقستان بالالارى» اتتى كەشەندى باعدارلامانى ازىرلەۋ, بالالاردىڭ ونلاين قاۋىپسىزدىگىن قامتاماسىز ەتۋ, سونداي-اق كامەلەتكە تولماعانداردىڭ جەكە دەرەكتەرىن قورعاۋ ماسەلەلەرى دە باسىم باعىتتاردىڭ ءبىرى بولماق.
جالپى, وبلىس اكىمدىكتەرى جانىنان بالا قۇقىقتارىن قورعاۋ جونىندەگى باسقارما قۇرۋ باستاماسى بالالاردىڭ قۇقىقتارىن قورعاۋ جۇيەسىن وڭىرلىك دەڭگەيدە كۇشەيتىپ, جاۋاپكەرشىلىكتى ناقتى بولۋگە جانە الدىن الۋ شارالارىنىڭ تيىمدىلىگىن ارتتىرۋعا باعىتتالعان.
