دەلەگاتسيا باسشىسى, قارۋلى كۇشتەر ۇلتتىق اسكەري-پاتريوتتىق ورتالىعىنىڭ باستىعى ارمان اسەنوۆتىڭ ايتۋىنشا, بۇل فەستيۆال وزگە ەلدەردىڭ مادەنيەتىمەن تانىسۋ ءارى حالىقارالىق بايلانىستاردى نىعايتۋ ءۇشىن ماڭىزدى الاڭعا اينالىپ وتىر.
وتاندىق ۇجىمنىڭ ونەرىنە فەستيۆال ۇيىمداستىرۋشىلارى مەن كورەرمەن قاۋىم جىلى لەبىزىن ءبىلدىردى. ماسەلەن, شۆەيتساريا دەلەگاتسياسىنىڭ وكىلى گەنەرال ەريك دجۋلليارد اسكەري جانە ۇلتتىق اۋەن ناقىشتارىن, ساپتىق سىمبات پەن حورەوگرافيانى ۇيلەستىرە بىلگەن ارتىستەردىڭ كاسىبيلىگىن اتاپ وتكەن.
اسكەري قىزمەتشىلەر ءوز رەپەرتۋارىندا ۇلتتىق ناقىش بولۋىنا نازار اۋدارىپ, الدىن الا دايىندالعان. اتاپ ايتقاندا, ولار نۇرعيسا تىلەنديەۆتىڭ, تەمىرحان قوجابەكوۆتىڭ «لەگەندا و تابۋنە», باقىتجان جەلدەرباەۆتىڭ «شابىت شىڭىندا» شىعارمالارى مەن Allah Ya Omri Qatar پاتريوتتىق ءانىن ورىندادى.
«وسىنداي جوعارى دەڭگەيدەگى فەستيۆالگە قاتىسۋ – ءبىز ءۇشىن ۇلكەن جەتىستىك ءارى زور جاۋاپكەرشىلىك. كورەرمەندەردىڭ اسەرىنە قاراپ, ەل اتىنان ابىرويمەن ونەر كورسەتتىك دەپ ويلايمىن», دەيدى ۇلتتىق اسكەري-پاتريوتتىق ورتالىعى ورتالىق اسكەري وركەسترىنىڭ باستىعى پودپولكوۆنيك ماقسات شاكەنوۆ.
فەستيۆالگە ۇلىبريتانيا, يوردانيا, يرلانديا, اقش, ومان, تۇركيا شىعارماشىلىق ۇجىمدارى مەن قاتاردىڭ ەليتالىق اسكەري-مۋزىكالىق وركەسترلەرى قاتىسقانىن ايتا كەتەيىك. شەتەلدىك ساپاردان ورالعان مۋزىكانتتاردى 19132 اسكەري ءبولىمنىڭ اسكەري اەرودرومىندا ارىپتەستەرى قارسى الىپ, قورعانىس مينيسترلىگى تاربيە جانە يدەولوگيالىق جۇمىس دەپارتامەنتى باستىعىنىڭ ورىنباسارى, پولكوۆنيك ۆيتالي اداموۆيچ وتانىمىزدىڭ ابىرويىن اسقاقتاتىپ قايتقان ونەر يەلەرىنە العىس ءبىلدىردى.
