فوتو: zakon.kz
ءاسانالى ءاشىموۆ شىعارماشىلىق جولىندا 30-دان استام فيلمگە ءتۇسىپ, 50-گە جۋىق ءرولدى شەبەر سومداعان.
تارلان تۇلعامەن قوشتاسۋ راسىمىنە مەملەكەتتىك حاتشى ەرلان قارين, پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا جانە الماتى قالاسىنىڭ اكىمى دارحان ساتىبالدى قاتىستى. ءاسانالى اشىموۆپەن قوشتاسۋعا ونىڭ تۋىستارى, ارىپتەستەرى مەن شاكىرتتەرى, اكتەردىڭ ونەرىن قۇرمەتتەيتىن مىڭداعان ادام جينالدى.
قوشتاسۋ راسىمىندە ءسوز العان الماتى قالاسىنىڭ اكىمى دارحان ءساتىبالدى اسانالى ءاشىموۆتىڭ تەك كينو مەن تەاتر ەمەس, ەل ماقتانىشى بولعانىن اتاپ ءوتتى.
«حالىق ءارتىسى ءاسانالى ءاشىموۆ – ءبىزدىڭ وتانىمىز ءۇشىن اڭىز ادام. ونىڭ جانىمىزدا جۇرگەنىنىڭ ءوزى ۇلكەن قۋانىش ەدى. ول تەك تەاتر مەن كينونىڭ عانا ەمەس, بۇكىل ەلدىڭ ماقتانىشى بولدى. ءومىرىن تەاتر مەن كينونىڭ دامۋىنا ارنادى, بىرنەشە بۋىن تالانتتاردى تاربيەلەدى. ونىڭ شاكىرتتەرى بۇل جولدى جالعاستىرادى دەپ سەنەمىز. ول قالا ماسەلەلەرىنە كوپ كوڭىل ءبولدى, حالىقتىڭ ءال-اۋقاتىنا ۇلەس قوستى. وكىنىشكە قاراي, ءومىردىڭ جوسپارى باسقا بولدى», دەدى د.ساتىبالدى.
مەملەكەت باسشىسى قاسىم-جومارت توقاەۆ حالىق ءارتىسى, قازاقستاننىڭ ەڭبەك ەرى ءاسانالى ءاشىموۆتىڭ دۇنيەدەن وتۋىنە بايلانىستى ونىڭ وتباسى مەن جاقىندارىنا كوڭىل ايتىپ, جەدەلحات جولدادى.
سونداي-اق ورنى تولماس قازاعا مەملەكەت جانە قوعام قايراتكەرلەرى دە كوڭىل ايتتى.
