فوتو: اشىق دەرەككوز
ۇكىمەت وتىرىسىندا قارجى ءمينيسترى ءمادي تاكيەۆ سالىق بەرەشەگىنىڭ شەكتى سوماسىن كوتەرۋ تۋرالى ماڭىزدى مالىمدەمە جاسادى. ءمينيستردىڭ ايتۋىنشا, قازىرگى ۋاقىتتا بورىشكەرلەردىڭ باسىم بولىگى وتە از سوما ءۇشىن زارداپ شەگىپ وتىر.
سالىق بەرەشەگى بار كاسىپكەرلەر قارىزىن كەيىنگە قالدىرا الادى
بۇعان دەيىن سالىق پەن الەۋمەتتىك تولەمدەر بويىنشا ناقتى تومەنگى شەك بولماعاندىقتان, ءتىپتى تيىن-تەبەن ءۇشىن دە ميكرو جانە شاعىن بيزنەستىڭ شوتتارى بۇعاتتالىپ, وپەراتسيالارى توقتاتىلاتىن.
«بورىشكەرلەردىڭ شامامەن 72%-ىنىڭ موينىندا 6 اەك-كە (شامامەن 26 مىڭ تەڭگە) جەتپەيتىن قارىز بار. وسىنىڭ كەسىرىنەن شىعىس وپەراتسيالارى توقتاتىلىپ, بيزنەس ۋاقىتى مەن اقشاسىن جوعالتىپ جاتىر», دەدى ءمادي تاكيەۆ.
جاڭا ەرەجەلەر بويىنشا سالىق تولەۋشىلەرگە قاتىستى شارالار قارىز سوماسىنا قاراي ءۇش ساتى بويىنشا قولدانىلادى:
- 87 مىڭ تەڭگەگە دەيىن (20 اەك): شوت بۇعاتتالمايدى. سالىق تولەۋشىگە تەك حابارلاما جىبەرىلىپ, ءوسىمپۇل (پەنيا) عانا ەسەپتەلەدى.
- 87 مىڭنان 195 مىڭ تەڭگەگە دەيىن (20–45 اەك): شىعىس وپەراتسيالارى تەك وتەلمەگەن بورىش سوماسى كولەمىندە عانا ۋاقىتشا توقتاتىلادى. ەگەر بۇل ەسكەرتۋ ەلەنبەسە, ماجبۇرلەپ الۋ تەتىكتەرى ىسكە قوسىلادى.
- 195 مىڭ تەڭگەدەن اسسا (45 اەك-تەن جوعارى): م ۇلىكتى تىزىمدەۋ, ساتۋ جانە دەبيتورلار ەسەبىنەن ءوندىرىپ الۋ سياقتى ەڭ قاتاڭ شارالار قولدانىلادى.
ءمينيستردىڭ سوزىنشە, الەۋمەتتىك تولەمدەردى ماجبۇرلەپ ءوندىرىپ الۋدىڭ تومەنگى شەگى دە شامامەن 26 مىڭ تەڭگەگە (6 اەك) دەيىن كوتەرىلەدى. بۇل قادام شاعىن بيزنەسكە ارتىق بيۋروكراتيالىق كەدەرگىسىز جۇمىس ىستەۋگە مۇمكىندىك بەرەدى.
بۇعان دەيىن ۇكىمەت باسشىسى جاڭا بيۋدجەت كودەكسىنە سايكەس شاعىن بيزنەستەن تۇسەتىن بارلىق سالىق ءتۇسىمى اكىمدىكتەردىڭ يەلىگىندە قالاتىنىن اتاپ ءوتتى.
