سۋرەت: senate.parlam.kz
بيۋرو وتىرىسىندا م.اشىمباەۆ مەملەكەت باسشىسى قاسىم-جومارت توقاەۆ بيىلعى جولداۋىندا ەلىمىزدى جاپپاي تسيفرلىق ەلگە اينالدىرۋ جونىندە ناقتى مىندەتتەر جۇكتەگەنىن اتاپ ءوتتى. كوزدەگەن ماقساتقا قول جەتكىزۋ ءۇشىن بارلىق دەڭگەيدەگى دەپۋتاتتار مۇددەلى تاراپتارمەن, ونىڭ ىشىندە ساراپشىلار قاۋىمداستىعىمەن بىرلەسىپ بىرقاتار زاڭ ازىرلەدى. ولاردىڭ قاتارىندا – قازاقستان رەسپۋبليكاسىنىڭ تسيفرلىق كودەكسى جانە وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تسيفرلاندىرۋ, كولىك جانە كاسىپكەرلىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», سونداي-اق «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭدار بار. بيۋرو مۇشەلەرى اتالعان زاڭداردى پالاتانىڭ الداعى وتىرىسىندا قاراۋ جونىندە شەشىم قابىلدادى. بۇل قۇجاتتار تسيفرلىق سالانى قۇقىقتىق رەتتەۋدىڭ بىرىڭعاي جانە اشىق جۇيەسىن قۇرۋعا باعىتتالعان. كودەكس دەرەكتەر مەن تسيفرلىق وبەكتىلەردى باسقارۋدىڭ قۇقىقتىق نەگىزىن قالىپتاستىرادى.
سەنات وتىرىسىنىڭ كۇن تارتىبىنە قازاقستان رەسپۋبليكاسىنىڭ قۇرىلىس كودەكسى مەن وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋلەت, قالا قۇرىلىسى جانە قۇرىلىس ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ شىعارىلدى. بۇل زاڭنامالىق نورمالار قالا قۇرىلىسىنا بايلانىستى شەشىمدەردى تالقىلاۋ كەزىندە تۇرعىندار كوپتەپ قاتىسىپ, قوعامدىق, جەكە مۇددەلەردى قوزعايتىن جوبالار بويىنشا ۇسىنىستار بەرە الادى, سونداي-اق زاڭ بۇزۋشىلىقتاردى جەدەل الدىن الۋدى كوزدەيدى.
سونىمەن قاتار سەناتورلار الداعى بەيسەنبىدە «قازاقستان رەسپۋبليكاسىنداعى بانكتەر جانە بانك قىزمەتى تۋرالى», «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قارجى نارىعىن رەتتەۋ مەن دامىتۋ, بايلانىس جانە بانكروتتىق ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى قارايدى. بيۋرو وتىرىسىندا اتالىپ وتكەندەي, بانكتەر تۋرالى جاڭا زاڭ بانك جۇيەسىنىڭ قارجىلىق تۇراقتىلىعىن ارتتىرۋعا, ۇلتتىق زاڭنامانى حالىقارالىق ستاندارتتارعا سايكەس كەلتىرۋگە ىقپال ەتەدى. قارجى سەكتورىندا باسەكەلەستىكتى دامىتۋ, يننوۆاتسيالاردى ىنتالاندىرۋ جونىندەگى شارالار دا ەسكەرىلمەك.
سونداي-اق «قازاقستان رەسپۋبليكاسىنىڭ ۇكىمەتى مەن ءبىلىم, عىلىم جانە مادەنيەت ماسەلەلەرى جونىندەگى بۇۇ (يۋنەسكو) اراسىنداعى قازاقستاندا يۋنەسكو اياسىنداعى 2-ساناتتى ورتالىق رەتىندە ورتالىق ازيا وڭىرلىك گلياتسيولوگيا ورتالىعىنىڭ مارتەبەسىن قايتا جالعاستىرۋ تۋرالى كەلىسىمدى راتيفيكاتسيالاۋ تۋرالى» جانە «قازاقستان رەسپۋبليكاسىنىڭ قىلمىستىق كودەكسىنە, قر قىلمىستىق-پروتسەستىك كودەكسىنە تولىقتىرۋلار ەنگىزۋ تۋرالى» زاڭدار سەنات وتىرىسىنىڭ كۇن تارتىبىنە شىعارىلدى.
بيۋرو وتىرىسىندا دەپۋتاتتار ءماجىلىس قابىلداعان زاڭداردى جۇمىس ءۇشىن پالاتانىڭ تۇراقتى كوميتەتتەرىنە ءبولىپ بەردى, سونداي-اق وسى اپتاعا ارنالعان ءىس-شارالار جوسپارىن پىسىقتادى. بۇل اپتادا سەناتورلار دارىلىك قاۋىپسىزدىكتى, ءدارى-دارمەكتەردىڭ قولجەتىمدىلىگىن, ساپاسىن, يمپورتتى الماستىرۋدى قامتاماسىز ەتۋگە, سونداي-اق اۋىل شارۋاشىلىعى ونىمدەرىن قايتا وڭدەۋ سالاسىنا وتاندىق, شەتەلدىك ينۆەستيتسيالاردى تارتۋعا قاتىستى ماسەلەلەر مەن باسقا دا ماڭىزدى تۇيتكىلدەرگە توقتالادى.
