فوتو: «Astana Parking Space» جشس
جەڭىس قاسىمبەكتىڭ ايتۋىنشا, وتكەن اپتادا اۆتوتۇراق ورىندارىن قالا مەنشىگىنە وتەۋسىز وتكىزۋ تۋرالى كەلىسىمگە قول قويىلعان.
«وسى اپتادان باستاپ قالاداعى اۆتوتۇراقتىڭ ءبارى تەك كوممۋنالدىق قىزمەتتەردىڭ قاراماعىندا بولادى جانە جەكە مەنشىككە جاتپايدى», دەدى استانا قالاسىنىڭ اكىمى.
وسىعان بايلانىستى قالاداعى اۆتوتۇراقتاردىڭ قولدانىستاعى تاريفتەرى قايتا قارالادى. مينۋتىنا تولەم الۋ ءتارتىبى ەنگىزىلمەيدى. جول ۋچاسكەسىنە قاراي كولىكتى 15–60 مينۋتتىق تەگىن قويۋ جۇيەسى قاراستىرىلعان. ال جول قوزعالىسى تىعىز جۇرەتىن ورتالىق كوشەلەردە اۆتوتۇراقتار اقىلى بولادى. ال الەۋمەتتىك ماڭىزى بار نىسانداردىڭ ماڭىنداعى اۆتوتۇراقتاردى تولىقتاي تەگىن ەتۋ جوسپارلانعان.
ايتا كەتەيىك, 2027 جىلى استانادا العاش رەت ەكى دەڭگەيلى الىپ اۆتوماگيسترال قۇرىلىسى باستالادى. بۇل جوبا قالا جولدارىنداعى جۇكتەمەنى ايتارلىقتاي جەڭىلدەتەدى.
سوناي-اق جەڭىس قاسىمبەك LRT-نىڭ رەسمي ىسكە قوسىلۋىنا ساناۋلى كۇندەر قالعانىن دا اتاپ ءوتتى.
