ءىس 2021 جىلعى مامىر ايىندا رەسمي ساپار كەزىندە ساۋد ارابياسىنىڭ تاق مۇراگەرى يمران حانعا سىيعا تارتقان Bulgari برەندىنىڭ قىمبات زەرگەرلىك بۇيىمدار جيىنتىعىنا بايلانىستى قوزعالعان. سوت پروتسەسى بارىسىندا ايىپتاۋ تاراپى ەكس-پرەمەردىڭ زەرگەرلىك بۇيىمدى مەملەكەتكە تاپسىرماي, وزىندە قالدىرعانىن, ول ءۇشىن نەبارى 2,9 ملن پاكىستان رۋپياسىن (شامامەن 10 350 اقش دوللارى) تولەگەنىن العا تارتتى. ال زەرگەرلىك جيىنتىقتىڭ نارىقتاعى قۇنى شامامەن 80 ملن رۋپياعا (285 500 اقش دوللارى) باعالانادى.
ۇكىم راۆالپيندي قالاسىنداعى اديالا تۇرمەسىندە وتكەن كوشپەلى سوت وتىرىسىندا ورتالىق سوتتىڭ ارنايى سۋدياسى شاحرۋح اردجۋماند تاراپىنان شىعارىلدى. قازىرگى ۋاقىتتا يمران حان وسى تۇرمەدە جازاسىن وتەپ جاتىر.
سوت شەشىمىمەن يمران حان مەملەكەتتىك قىزمەتشىلەردىڭ لاۋازىمدىق قىلمىستارى مەن سەنىمدى تەرىس پايدالانۋ باپتارى بويىنشا كىنالى دەپ تانىلىپ, 17 جىلعا باس بوستاندىعىنان ايىرىلدى. وسى باپتار بويىنشا ونىڭ جۇبايى بۋشرا بيبي دە 17 جىلعا سوتتالدى.
سونىمەن قاتار, ەكەۋىنە دە 16,4 ملن رۋپيا (شامامەن 58 500 اقش دوللارى) كولەمىندە ايىپپۇل سالىندى. زاڭناماعا سايكەس, ايىپپۇل تولەنبەگەن جاعدايدا قوسىمشا تۇرمە جازاسى قاراستىرىلعان.
پاكىستاننىڭ اقپارات ءمينيسترى اتتاۋللا تاراردىڭ ايتۋىنشا, بۇل ءىس بويىنشا تاعايىندالعان جازا يمران حاننىڭ بۇرىنعى ۇكىمىنىڭ مەرزىمى اياقتالعاننان كەيىن ەسەپتەلە باستايدى. ايتا كەتەيىك, 2025 جىلعى قاڭتاردا ول 190 ملن فۋنت ستەرلينگكە قاتىستى سىبايلاس جەمقورلىق ءىسى بويىنشا 14 جىلعا سوتتالعان بولاتىن. اتالعان ءىس اياسىندا ونىڭ جۇبايى دا جەتى جىلعا باس بوستاندىعىنان ايىرىلعان.
بۇدان بولەك, يمران حانعا 2023 جىلعى 9 مامىرداعى جاپپاي نارازىلىقتارعا بايلانىستى تەرروريزمگە قارسى زاڭ اياسىندا تاعى ءبىر سوت پروتسەسى ءوتۋى مۇمكىن.
ايىپتالۋشىلار بارلىق تاعىلعان ايىپتاردى جوققا شىعارىپ, ولاردى قولدان جاسالعان ءارى ساياسي استارى بار دەپ اتادى. PTI پارتياسى سوت ۇكىمىن قاتاڭ سىنعا الىپ, ونى «كونستيتۋتسياعا قايشى», «زاڭسىز» جانە «ساياسي كەك الۋدىڭ ەڭ سوراقى كورىنىسى» دەپ باعالادى.
73 جاستاعى يمران حان 2018 جىلدان 2022 جىلعا دەيىن پاكىستاننىڭ پرەمەر-ءمينيسترى قىزمەتىن اتقارعان.
