ءىس-شاراعا الماتى وبلىسىنىڭ اكىمى مارات سۇلتانعازيەۆ پەن قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى قاتىستى. كونفەرەنتسيا جىل باسىنان بەرى ەلىمىزدىڭ ءتۇرلى ايماقتارىندا ءداستۇرلى رۋحاني-ادامگەرشىلىك قۇندىلىقتاردى ىلگەرىلەتۋگە باعىتتالعان جۇيەلى جۇمىستار اياسىندا وتكەن مازمۇندى شارالاردىڭ قورىتىندىسى بولدى. جۇمىس ساپارى اياسىندا وبلىس اكىمى مەن باس ءمۇفتيدىڭ كەزدەسۋى ءوتتى. ءوڭىر باسشىسى تۇراقتى ءدىني احۋالدى ساقتاۋ, قوعامدىق كەلىسىمدى نىعايتۋ جانە ءداستۇرلى قۇندىلىقتاردى دارىپتەۋدىڭ ماڭىزىن اتاپ ءوتتى. تاراپتار ءدىني قىزمەتكەرلەردىڭ بىلىكتىلىگىن ارتتىرۋ جانە جاستاردىڭ رۋحاني-ادامگەرشىلىك تاربيەسىن كۇشەيتۋگە باعىتتالعان بىرلەسكەن جوبالاردى ىسكە اسىرۋ ماسەلەلەرىن تالقىلادى.
كونفەرەنتسيانىڭ اشىلۋىندا ءسوز سويلەگەن مارات سۇلتانعازيەۆ قازىرگى سىن-قاتەرلەر جاعدايىندا وتباسى ينستيتۋتىن نىعايتۋ تەك الەۋمەتتىك مىندەت قانا ەمەس, ۇلتتىق قاۋىپسىزدىكتىڭ ماڭىزدى قۇرامداس بولىگى ەكەنىن اتاپ ءوتتى.
«مەملەكەت جاعداي جاساپ, ماتەريالدىق قولداۋ كورسەتە الادى, الايدا وتباسىنىڭ شىنايى ءال-اۋقاتى رۋحاني قۇندىلىقتار – قۇرمەت, جاۋاپكەرشىلىك, ءوزارا سەنىم جانە ءداستۇر ساباقتاستىعى ارقىلى قالىپتاسادى», دەدى ول.
كونفەرەنتسيا بارىسىندا وتباسىنىڭ ادامگەرشىلىك باعدارلاردى قالىپتاستىرۋداعى, مادەني ساباقتاستىقتى ساقتاۋداعى جانە وسكەلەڭ ۇرپاقتى تاربيەلەۋدەگى نەگىزگى ينستيتۋت رەتىندەگى رولىنە ەرەكشە نازار اۋدارىلدى. وسى تۇرعىدا ءداستۇرلى يسلام قۇندىلىقتارىنىڭ ماڭىزى اتاپ ءوتىلدى. وندا وتباسى ادالدىققا, قۇرمەتكە, جاۋاپكەرشىلىككە, سابىرلىلىق پەن ءوزارا سىيلاستىققا نەگىزدەلگەن امانات رەتىندە قاراستىرىلادى. بۇل قاعيداتتار قازاق حالقىنىڭ سالت-داستۇرىمەن تاريحي تۇرعىدا ۇيلەسەدى.
جىل باسىنان بەرى وڭىردە 7 302 نەكە تىركەلگەن. الماتى وبلىسىندا 75 678 كوپبالالى وتباسى تۇرادى, 11 975 انا «التىن القا» جانە «كۇمىس القا» يەگەرى اتانعان.
سونىمەن قاتار وڭىردە وتباسى ينستيتۋتىن جانە الەۋمەتتىك وسال ساناتتاعى ازاماتتاردى قولداۋعا باعىتتالعان كەشەندى شارالار جۇزەگە اسىرىلۋدا. جىل باسىنان بەرى 3 522 وتباسىنا 2,3 ملرد تەڭگەدەن استام سوماعا اتاۋلى الەۋمەتتىك كومەك كورسەتىلدى. تۇرعىن ءۇي باعدارلامالارى اياسىندا الەۋمەتتىك وسال ساناتتاعى ازاماتتارعا 427 پاتەر بەرىلدى.
وڭىردە 312 مەشىت جۇمىس ىستەيدى, وندا 517 ءدىني قىزمەتكەر ەڭبەك ەتەدى. 2024–2025 جىلدارى 200-دەن استام يمام تەولوگتار, زاڭگەرلەر مەن پسيحولوگتاردىڭ قاتىسۋىمەن ارنايى كۋرستار مەن سەمينارلاردان ءوتتى. وقىتۋ ءدىني ەكسترەميزمنىڭ الدىن الۋعا, وتباسىلىق جانجالداردى شەشۋگە, جاستارمەن جۇمىس ىستەۋگە جانە دەسترۋكتيۆتى يدەولوگيالارعا قارسى تۇرۋعا باعىتتالعان.
قاتىسۋشىلار 2025 جىلدى «يسلام جانە وتباسىلىق قۇندىلىقتار» جىلى دەپ جاريالاۋ باستاماسىن ۋاقتىلى ءارى ماڭىزدى شەشىم رەتىندە اتاپ ءوتتى. بۇل قادام وتباسى ينستيتۋتىن قولداۋعا, جاستاردىڭ رۋحاني-ادامگەرشىلىك تاربيەسىن نىعايتۋعا جانە قوعامدى توپتاستىرۋعا باعىتتالعان.
كونفەرەنتسيا قورىتىندىسى بويىنشا قاتىسۋشىلار ايتىلعان ۇسىنىستار مەن باستامالار الماتى وبلىسى مەن جالپى ەل كولەمىندە وتباسى ينستيتۋتىن نىعايتۋعا, رۋحاني قۇندىلىقتاردى دامىتۋعا جانە الەۋمەتتىك ءال-اۋقاتتى ارتتىرۋعا ءوز ۇلەسىن قوساتىنىنا سەنىم ءبىلدىردى.
الماتى وبلىسى.
