اقتوبە. 11 مامىر. اقتوبە وبلىسى حرومتاۋ قالاسىندا قازاقستان شاحمات فەدەراتسياسى مەن ەۋرازيالىق توپ (ەRG) بىرلەسىپ, ۇلى جەڭىستىڭ 70 جىلدىعىنا ارنالعان ءىس-شارالار اياسىندا «شەبەرمەن كەزدەسۋ» اتتى شاحمات ءتۋرنيرىن وتكىزدى. وعان قازاقستان رەسپۋبليكاسى ايەلدەر قۇراماسىنىڭ جاتتىقتىرۋشىسى, حالىقارالىق گروسسمەيستر پاۆەل كوتسۋر ارنايى قاتىسىپ, تاجىريبەسىمەن ءبولىستى. بۇل تۋرالى egemen.kz ءتىلشىسى حابارلادى.
سايىس تاۋ-كەن-مەتاللۋرگيالىق كاسىپورىندارى ورنالاسقان مونوقالالاردا شاحماتتى ناسيحاتتاۋ ماقساتىندا ۇيىمداستىرىلدى. شارا ەلىمىزدە شاحمات قوزعالىسىن دامىتۋ باعدارلاماسى اياسىندا وتكىزىلدى. شاحمات فەدەراتسياسى ەۋرازيالىق توپپەن بىرلەسىپ ەلىمىزدە بىرقاتار وسىنداي اكتسيالاردىڭ وتۋىنە ۇيىتقى بولىپ كەلەدى.
«ەۋرازيالىق توپتىڭ ەلىمىزدىڭ شاحمات فەدەراتسياسىمەن وسىنداي ءوزارا بىرلەسكەن جوبانى جۇزەگە اسىرىپ كەلە جاتقانىنا وتە ريزامىن. بۇل شىنىمەن وتە سيرەك كەزدەسەتىن مۇمكىندىك, حالىقارالىق دارەجەدەگى گروسسمەيستەرمەن ويىن ويناۋ – زور قۋانىش. ءبىزدىڭ «قازحروم» كومپانياسى مەن ەۋرازيالىق توپ وزدەرىنىڭ قىزمەتكەرلەرىنە ۇنەمى قامقورلىق كورسەتىپ جۇرەتىندىگىنە ريزاشىلىعىمدى بىلدىرەمىن. كەيبىر قاتىسۋشىلار ءۇشىن اتاقتى شاحماتشىمەن بۇگىنگى كەزدەسۋ شەبەرلىكتەرىن دامىتۋدىڭ جاڭا كەزەڭى بولدى», – دەيدى ءدوڭ تاۋ-كەن بايىتۋ كومبيناتى ديرەكتورىنىڭ ورىنباسارى سايداكبار ماۆلادحودجاەۆ.
ERG قىزمەتكەرلەرى, ولاردىڭ وتباسىلارى جانە حرومتاۋ قالاسىنىڭ تۇرعىندارى حالىقارالىق گروسسمەيستر پاۆەل كوتسۋرمەن ءبىر مەزەتتە بليتس-تۋرنير وتكىزدى. ناتيجەسىندە 1-ورىندى اقتوبە فەرروقورىتپا زاۋىتى №4 بالقىتۋ تسەحىنىڭ وپەراتورى مەيرامبەك اقبالين, 2- ورىندى ەلەكتر-جوندەۋ تسەحىنىڭ اۋىسىم شەبەرى باۋبەك قوجانيازوۆ, ال 3-ورىندى ءدون تاۋ-كەن بايىتۋ كومبيناتى «مولودەجنايا» شاحتاسىنىڭ ەلەكتروليز ءماشينيسى رۋسلان وسپانوۆ الدى.
ساتىبالدى ءساۋىرباي.
دەرەك, سۋرەت: egemen.kz.
