ساحنا سىرتىندا ەل كورمەگەن, ءبىز بىلمەيتىن قانشاما قاجىرلى ەڭبەك جاتىر. سونى ەسكەرگەندەي, بيىلعى ماراپاتتاۋ ءراسىمى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا, سول عابەڭنىڭ: «تەاتر ونەرى – حاس سۇلۋدىڭ كوز جاسىنداي ءمولدىر ونەر», دەگەن قاناتتى سوزىنەن باستاۋ الدى.
تەاتر قايراتكەرلەر وداعى مەن الماتى قالالىق اكىمدىگىنىڭ قولداۋىمەن ءداستۇرلى تۇردە بەرىلەتىن بۇل سىيلىق ءىرى شاھارلارداعى ساحنا قايراتكەرلەرىن عانا ەمەس, ەلىمىزدىڭ ءار وڭىرىندەگى جەتەكشى مەملەكەتتىك تەاترلاردى دا باعالاپ كەلەدى.
– بايگەدەن ۇمىتكەرلەر ايتارلىقتاي كوپ جانە بىرىنەن-ءبىرى وتكەن مىقتىلار, ۇزدىكتەردى انىقتاۋ وڭايعا تۇسپەدى. ساراپشى رەتىندە باسىنان اياعىنا دەيىن تولىق قاتىستىم. ال دراماتۋرگ رەتىندە «جىل دراماتۋرگى» سىيلىعىن قازىبەك امانجولعا تابىستاۋىم – ەرەكشە ەستە قالاتىن قۋانىشتى جاعداي. كوپتەن بەرى ونەر اكادەمياسىندا جاس دراماتۋرگتەردى باۋلىپ جۇرگەندىكتەن, ولاردىڭ ءاربىر جەتىستىگىنە شىن قۋانامىن. تەاتر ونەرى, ەڭ الدىمەن, سول ۇلتتىڭ دراماتۋرگياسىنان باستاۋ الادى, – دەيدى ەلىمىزگە تانىمال دراماتۋرگ ءسۇلتانالى بالعاباەۆ.
«ەڭلىكگۇل – 2025» سىيلىعىن تابىستاۋ سالتاناتى اباي اتىنداعى قازاق ۇلتتىق وپەرا جانە بالەت تەاترىنداعى «ششەلكۋنچيك» بالەتىنىڭ القىزىل ۆالسىنەن باستالدى. ال م.اۋەزوۆ اتىنداعى قازاق ۇلتتىق دراما تەاترى ۋزەير گادجيبەكوۆتىڭ «ارشىن مال الان» سپەكتاكلىنەن ءۇزىندى الا كەلگەن.
سونىمەن «جىلدىڭ ەڭ ۇزدىك سپەكتاكلدى جارىقپەن كوركەمدەۋشىسى» جۇلدەسىن حاديشا بوكەەۆا اتىنداعى باتىس قازاقستان وبلىستىق دراما تەاترىنان ءادىلجان بايشاشاقوۆ اكەتتى. ال «جىلدىڭ ۇزدىك مۋزىكامەن كوركەمدەۋشىسى» سىيلىعى شىمكەنت قالاسىنداعى ورىس دراما تەاترىنىڭ قىزمەتكەرى ۆلاديمير كۋليكوۆقا بۇيىردى.
«جىلدىڭ ەڭ ۇزدىك تەاتر مەنەدجەرى» اتاعى س.قوجامقۇلوۆ اتىنداعى ۇلىتاۋ وبلىستىق مۋزىكالىق دراما تەاترىنىڭ بەلدى قىزمەتكەرى دوسقان ساكەنگە بەرىلدى. «جىلدىڭ ەڭ ۇزدىك تەاتر تۋرالى ماقالاسى» جۇلدەسىن «ماسادان كورولگە دەيىن» كىتابى ءۇشىن بەيبىت الكەەۆا الدى.
«جىلدىڭ ۇزدىك درامالىق سپەكتاكلدەر بالەتمەيستەرى» اتالىمىن «راەچكا», «سەنى سۇيەم», «گاملەت. سوڭعى كۇندەر» سپەكتاكلدەرىندەگى جۇمىسىنا ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى بالەتمەيستەرى سالتانات بەيميشەۆا قانجىعالادى.
«بالالارعا ارنالعان سپەكتاكلدەگى جىلدىڭ ۇزدىك شىعارماشىلىق جۇمىسى» جۇلدەسى الماتى مەملەكەتتىك اكادەميالىق قۋىرشاق تەاترىنا, «جىلدىڭ ەڭ ۇزدىك تەاتر سۋرەتشىسى» جۇلدەسى ك.ستانيسلاۆسكي اتىنداعى قاراعاندى وبلىستىق ورىس دراما تەاترىنىڭ قىلقالام شەبەرى ەلەنا كيمگە, «تەاتر ونەرىنە ۇزاق جىلدار سىڭىرگەن ەڭبەگى ءۇشىن» اتالىمى مۇحتار اۋەزوۆ اتىنداعى قازاق ۇلتتىق دراما تەاترىنىڭ ءارتىسى, قازاقستاننىڭ حالىق ءارتىسى نۇكەتاي مىشباەۆاعا, «تەاتر ونەرىن دامىتۋعا قوسقان ۇلەسى ءۇشىن» اتالىمى قاليبەك قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ ءارتىسى, قازاقستاننىڭ ەڭبەك سىڭىرگەن قايراتكەرى تۇيمەحان اتىمتاەۆاعا, «ەڭ ۇزدىك جىل رەجيسسەرى» ماراپاتى مۇحتار اۋەزوۆ اتىنداعى قازاق ۇلتتىق دراما تەاترىنداعى «قارا», «جارماق» سپەكتاكلدەرى ءۇشىن جۇلدىزبەك جۇمانبايعا, «ەڭ ۇزدىك جىل اكتريساسى» اتاعى ن.بەكەجانوۆ اتىنداعى قىزىلوردا وبلىستىق اكادەميالىق مۋزىكالىق دراما تەاترىنىڭ ءارتىسى زاليپا تولەپوۆاعا بۇيىردى.
«ەڭ ۇزدىك جىل اكتەرى» سىيلىعى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ءارتىسى شاعۋان ۇمبەتقاليەۆكە «گاملەت. سوڭعى كۇندەر» قويىلىمىنداعى – گوراتسيو, «رەۆيزور» سپەكتاكلىندەگى –بوبچينسكي ءرولى ءۇشىن بەرىلدى.
«ەڭلىكگۇل – 2025» سىيلىعىنىڭ بيىلعى يەگەرلەرىنە ەسترادا تارلاندارى ونەردەن شاشۋ شاشتى.
الماتى
