فوتو: istockphoto.com
ءمينيستردىڭ ايتۋىنشا, ۋنيۆەرسيتەتتە اتىس شىعارعان كلاۋديو مانۋەل نەۆەس ۆالەنتەنىڭ ەلگە 2017 جىلى ءدال وسى گرين-كارتا باعدارلاماسى بويىنشا كەلگەنىن مالىمدەدى. كۇدىكتى كەزىندە DV1 لوتەرەياسى ارقىلى ۆيزا الىپ, كەيىننەن گرين-كارتا يەلەنگەن.
«بۇل جيىركەنىشتى ادامعا ءبىزدىڭ ەلگە كىرۋگە ەشقاشان رۇقسات بەرىلمەۋى كەرەك ەدى», دەپ جازدى مينيستر ءوزىنىڭ X جەلىسىندەگى پاراقشاسىندا.
سونىمەن قاتار, كريستي نوەم 2017 جىلى نيۋ-يوركتە بولعان تاعى ءبىر قاندى وقيعانى مىسالعا كەلتىردى. سول تۇستا DV1 باعدارلاماسىمەن كەلگەن يگيل تەررورشى جۇك كولىگىمەن سەگىز ادامدى قاعىپ ولتىرگەن بولاتىن. مينيستر سول ۋاقىتتان بەرى پرەزيدەنت ترامپتىڭ بۇل باعدارلامانى توقتاتۋ ءۇشىن كۇرەسىپ كەلگەنىن ەسكە سالدى.
«پرەزيدەنت ترامپتىڭ نۇسقاۋىمەن مەن USCIS-كە (اقش-تىڭ ازاماتتىق جانە يمميگراتسيالىق قىزمەتى) وسى باعدارلامادان بۇدان بىلاي امەريكالىقتار زارداپ شەكپەۋى ءۇشىن DV1 باعدارلاماسىن دەرەۋ توقتاتۋدى تاپسىرامىن», دەپ حابارلادى كريستي نوەم.
ايتا كەتەيىك, گرين-كارتا (Permanent Resident Card) – اقش-تا تۇراقتى تۇرۋعا جانە جۇمىس ىستەۋگە زاڭدى قۇقىق بەرەتىن قۇجات. بۇل شەتەلدىكتەر ءۇشىن امەريكاعا قونىس اۋدارۋدىڭ ەڭ ءتيىمدى جولى سانالىپ كەلگەن ەدى. سوڭعى رەت لوتەرەيا ناتيجەلەرى وسى جىلدىڭ كوكتەمىندە جاريالانعان بولاتىن. ەندىگى كەزەكتە باعدارلامانىڭ بولاشاعى قاتاڭ باقىلاۋعا الىنباق.
