اتىراۋدا ەكسترەميزمدى ناسيحاتتاۋشىلار سوتتالدى

اتىراۋ. 23 اقپان. اتىراۋ وبلىسىنداعى كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىندا 1995 جىلى تۋعان نۇرلان مەن 1998 جىلى تۋعان دامير ەسىمدى سوتتالۋشىلارعا ەكسترەميزمدى ناسيحاتتاعانى ءۇشىن سوت ۇكىمى شىقتى. بۇل تۋرالى اتىراۋ وبلىستىق سوتىنىڭ ءباسپاسوز حابارلادى. حابارلامادا كورسەتىلگەندەي, سوتتالۋشىلار عالامتور جەلىسىنەن ءار ءتۇرلى سايتتار ارقىلى «قارۋلى جيھاد» يدەولوگياسىن ناسيحاتتايتىن ماتەريالداردى قاراپ, مۇسىلمانداردى قۇتقارۋ ءۇشىن سيريا اۋماعىنداعى «مودجاحەدتەر» قاتارىندا رەسمي بيلىككە جانە قارۋلى كۇشتەرگە قارسى بولىپ جاتقان سوعىس قيمىلدارى تۋرالى بەينە ماتەريالداردى دىندەس باۋىرلارى اراسىندا ۇيالى تەلەفونىنان كورسەستىپ, ناسيحات جۇرگىزگەن. سوت باستى سوت تالقىلاۋىندا سوتتالۋشىلاردىڭ الدىنا الا تەرگەۋدە جانە سوت تەرگەۋىندە بەرگەن جاۋاپتارى سالىستىرىلا وتىرىپ, زەردەلەندى. «ەكسترەميزمدى ناسيحاتتاۋشىلار قىلمىستىق كودەكستىڭ 233-1-بابىنىڭ 2-بولىگىمەن كىنالى دەپ تانىلىپ, ولاردىڭ ارقايسىسىنا 5 (بەس) جىل مەرزىمگە باس بوستاندىعىنان ايىرۋ جازاسى تاعايىندالدى» دەدى وبلىستىق سوتتىڭ ءباسپاسوز حاتشىسى بورانباي عاليەۆ. جولداسبەك شوپەعۇل. دەرەك, سۋرەت: اتىراۋ وبلىستىق سوتىنىڭ ءباسپاسوز قىزمەتى.