اتىراۋ قالالىق سوتىنىڭ مالىمەتىنە قاراعاندا, تۇتىنۋشى ك.ت. جەكە كاسىپكەر س.-دان شىعىنداردى وتەۋ, مورالدىق زياندى ءوندىرۋ تۋرالى تالاپ قويعان.
«تالاپ قويۋشى مەن جەكە كاسىپكەر اراسىندا شارت جاسالعان. سوعان سايكەس جاۋاپكەر اق ءتۇستى تەرەزە مەن جاقتاۋىن دايىنداۋ, ورناتۋدى مىندەتىنە العان. الايدا, جاۋاپكەر مىندەتتەمەنى تيىسىنشە ورىنداماي, ورناتىلعان تەرەزە جاقتاۋى سۇر ءتۇستى بولىپ شىققان. تەرەزە مەن جاقتاۋىن ۆيزۋالدى قاراۋ كەزىندە ءبىر-بىرىنەن ەرەكشەلەنىپ, جاعىمسىز كورىنىس تاپقان», دەپ حابارلادى اتالعان سوتتان.
الايدا جاۋاپكەر تۇتىنۋشىنىڭ تالابىمەن كەلىسپەدى. ءىستى قاراۋ كەزىندە اتىراۋ وبلىستىق سوت ساراپتاماسى ينستيتۋتىنىڭ مامانى جازباشا قورىتىندى بەرۋ ءۇشىن تارتىلدى. ساراپشى تاۋاردىڭ تاراپتارى اراسىندا جاساقتالعان تالاپتارعا سايكەس ەمەستىگى تۋرالى قورىتىندى بەردى.
«سوت شەشىمىمەن تالاپ قويۋ ءىشىنارا قاناعاتتاندىرىلدى. جەكە كاسىپكەردەن تۇتىنۋشىنىڭ پايداسىنا ساپاسىز تاۋاردىڭ كەمشىلىگىن تۇزەتۋگە بايلانىستى شىعىنداردى وتەۋ ءۇشىن 1 ملن 214 مىڭ 370 تەڭگە, 20 مىڭ تەڭگە مورالدىق زيان وتەماقىسى ءوندىرىلدى», دەپ مالىمدەدى سوتتان.
سوت شەشىمى زاڭدى كۇشىنە ەندى.
