اقتوبەدە «قالادان – اۋىلعا» اكتسياسى باستالدى

اقتوبە. 11 تامىز. اقتوبە وبلىستىق «نۇر-عاسىر» ورتالىق مەشىتى يماندىلىققا تاربيەلەيتىن «قالادان – اۋىلعا» اتتى اكتسياسىن ۇيىمداستىرۋدا. بۇل تۋرالى egemen.kz حابارلادى. اكتسيا الدىمەن العا, قاندىاعاش, ەمبى قالالارىندا, شۇبارشي, كەنقياك, شۇبارقۇدىق ەلدى مەكەندەرىندە, بايعانين اۋدانىنىڭ ورتالىعىندا وتكىزىلەدى. وسى ءىس-شاراعا «نۇر-عاسىر» مەشىتى, «اڭسار» اقپاراتتىق تالداۋ ورتالىعى جانە تەراپەۆت, رەنگەنولوگ دارىگەرلەر جۇمىلدىرىلعان. شارا شەڭبەرىندە جاستاردى ءدىني ءبىلىم الۋعا, كەيىن ءوزىنىڭ جەرگىلىكتى جەرىنە قىزمەت ەتۋگە شاقىرۋ, قازىرگى تاڭداعى ءارتۇرلى اۋرۋلاردىڭ الدىن الۋ ماقساتىندا جۇرگىزەتىن ەكپەلەردىڭ (ۆاكتسيناتسيا) قاجەتتىلىگى, ەكپەگە قاتىستى قوعامدا قالىپتاسقان ءتۇرلى تەرىس پىكىرلەردى جويۋعا باعىتتالعان ءتۇسىندىرۋ جۇمىستارى, الەۋمەتتىك جاعدايى تومەن وتباسىلارعا كومەك قولىن سوزۋ ماقساتىنداعى قايىرىمدىلىق اكتسياسى, ارنايى مەديتسينالىق جابدىقتارمەن قامتىلعان دارىگەرلىك كومەك كورسەتۋ مەن تەگىن كەڭەستەر وتكىزۋ قاراستىرىلعان. سونداي-اق, ءدىني ساۋاتتىلىق, جات اعىمداردىڭ زيانى تۋرالى دا اڭگىمە بولىپ, ناسيحات ايتىلادى, اۋىلدارداعى ءدىني احۋال نازارعا الىنادى. ساتىبالدى ءساۋىرباي. دەرەك: egemen.kz. سۋرەت: plus.google.com.