جىلىنا 120 مىڭ كولىك شىعارادى
«Astana Motors» كومپانياسى بيىل قىركۇيەكتە تاعى ءبىر ىرگەلى جوبانى ىسكە قوستى. ول – قىتايدىڭ جەتەكشى ءۇش اۆتوكولىك برەندىن, اتاپ ايتقاندا «Chery», «GWM» (Haval, Tank) جانە «Changan» كولىكتەرىن وندىرەتىن الەمدەگى العاشقى مۋلتيبرەندتى زاۋىت – «Astana Motors Manufacturing Kazakhstan». بۇل جولى ءبىز ات باسىن بۇرعان ءبىرىنشى كاسىپورىن دا وسى ەدى.
مۇنداعى ماماندار بولشەكتەن ءبۇتىندى شىعارادى. باستاپقىدا شاناق ەش دەتالى جوق, سۇپ-سۇر تەمىر قاڭقا بوپ كەلەدى. ونىڭ ءىشى-سىرتىنداعى مىڭداعان بولشەكتى وسى زاۋىت جۇمىسشىلارى وزدەرى دانەكەرلەيدى, ۇساق دەتالدان باستاپ وزدەرى قۇرايدى, بۇرايدى, سىرلايدى. مۇنى «ۇساق ءتۇيىندى ءادىس» دەپ اتايدى ەكەن. سوڭىندا دايىن كولىكتى الدىڭىزعا كولدەنەڭ تارتادى. ەكى اۋىسىممەن جۇمىس ىستەگەندە جىلىنا 120 000 كولىك دايىندايدى.
AMMKZ زاۋىتىندا دا دانەكەرلەۋدەن باستاپ قۇراستىرۋعا دەيىنگى كەزەڭدە جالپى سانى 54 روبوت قولدانىلادى ەكەن.
بىراق, بۇل «دايىن اسقا تىك قاسىق» بولۋ دەگەن ءسوز ەمەس. جۇمىستىڭ ۇلكەن بولىگىن ماماندار ىستەيدى. قازىر كاسىپورىندا 2450 ادام بار. تولىق قۋاتقا شىققاندا شتات 3600-گە دەيىن وسەدى دەسەدى. قاراپايىم جۇمىسشىدان باستاپ, تسەح باسشىسى, ينجەنەر دەگەندەردىڭ ءبارى – جەرگىلىكتى ازاماتتار, كوپشىلىگى - وسى الماتى وبلىسىنىڭ تۇرعىندارى.
بۇعان قوسا «Astana Motors» كولىك شىعارۋدا لوكاليزاتسيانى تەرەڭدەتۋ ىسىنە دە ەرەكشە ءمان بەرىپ وتىر. ياعني, شەتەلدىڭ دايىن دۇنيەسىن قۇراي بەرمەي, وتاندىق ۇلەستى ۇلعايتۋ كەرەك.
«Astana Motors» ۇكىمەتپەن لوكاليزاتسيانى تەرەڭدەتۋ جونىندە ديالوگ جۇرگىزىپ جاتىر. وتاندىق ۇلەس ءوسۋى ءۇشىن اۆتوونەركاسىپكە دەگەن تالاپتى ارتتىرۋ قاجەت. بيىل كاسىپورىندارىمىزدا كولىكتىڭ 30%-ى شاناقتى دانەكەرلەۋ جانە بوياۋ ارقىلى ۇساق ءتۇيىندى ادىسپەن (CKD) ءوندىرىلدى. بۇل بىزدە اۆتوكولىكتىڭ تۇپكىلىكتى قۇنىن تومەندەتۋگە مۇمكىندىك بەرەدى. ماسەلەن AMMKZ زاۋىتى ىسكە قوسىلعاننان كەيىن ونداعى مودەلدەردىڭ باعاسى 12-19% تومەندەدى», دەيدى «Astana Motors» نەگىزىن قالاۋشى نۇرلان سماعۇلوۆ.
كومپانيانىڭ تۇپكىلىكتى كوزدەگەنى – اۆتوكومپونەنتتەر ءوندىرىسى ەسەبىنەن لوكاليزاتسيانى 5 جىل ىشىندە 51%-عا جەتكىزۋ.
«جەرگىلىكتى ۇلەس 51%-دان اسسا اۆتوكولىكتەرىمىزدى سىرت ەلدەرگە كەدەندىك تاريفتەرسىز وتكىزەمىز», دەيدى «Astana Motors» باس ديرەكتورى بەكنۇر نەسىپباەۆ.
كومپانيا باسشىلارىنىڭ ايتۋىنشا, قىزمەتكەرلەردىڭ ورتاشا جالاقىسى – 450 مىڭ تەڭگە. مەديتسينالىق ساقتاندىرۋدى قىزمەتكەرمەن قوسا وتباسىنىڭ تاعى ەكى مۇشەسى پايدالانا الادى, وعان ءتىس دارىگەرىنىڭ قىزمەتى دە كىرەدى ەكەن. مىڭ ورىندىق زاماناۋي اسحانادا تاماق تەگىن بەرىلەدى. عيماراتتىڭ ىشىندە, كەڭسەنىڭ قاق ورتاسىندا وسىمدىكتىڭ ءتۇر-ءتۇرى جايقالعان قىسقى باق ورنالاسقان. ودان ءارى وتسەڭىز فيتنەس-ورتالىق, فۋتبول, ۆولەيبول, باسكەتبول زالدارى, بوكس سەكتسياسى جارقىراپ تۇر. ونىڭ ءبارى تەگىن.
اۆتوبولشەكتەر وزىمىزدە جاسالادى
بۇدان ءارى «Astana Motors» اۆتوكومپونەنتتەر ءوندىرۋ تەحنوپاركىمەن تانىستىق.
«Almaty Autoparts Production» كاسىپورنى «Hyundai Trans Kazakhstan» زاۋىتىندا وندىرىلەتىن «Hyundai Tucson» جانە «Santa Fe» مودەلدەرىنىڭ ورىندىعىن شىعارادى. قۋاتى جىلىنا 100 مىڭ ورىندىق شىعارۋعا جەتەدى. زاۋىتتا قازىر 150 جۇمىسشى بار. ەكىنشى كەزەڭدە ورىندىق قاپتاۋ تسەحى ىسكە قوسىلعان سوڭ جۇمىسشىلار سانى 350 ادامعا دەيىن وسەدى دەيدى. كومپانيا باسشىسىنىڭ ايتۋىنشا, بۇرىن مۇنداي ورىندىقتار دايىن كۇيىندە كورەيادان تاسىمالدانىپ كەلىپتى. ول – ۇلكەن شىعىن ەدى. قازىر سونى ءوزىمىزدىڭ ماماندار جاساۋدى ۇيرەنىپ, تاۋار قۇنى ايتارلىقتاي تومەندەپ وتىر. بۇل اۆتوكولىك باعاسىنىڭ ءسال دە بولسا ارزانداۋىنا سەپ.
مۋلتيمەديالىق جۇيەلەر شىعاراتىن «Kazakhstan Mobility Engineering» كاسىپورنى دا جىلىنا 100 مىڭ دانا ءونىم دايىنداي الادى. مۋلتيمەديالىق جۇيە دەگەنىڭىز – اۆتوكولىكتىڭ اۋديو-ۆيدەو قۇرىلعىسى. ياعني, ەلىمىزدە شىعارىلىپ جاتقان «Tucson», «Elantra», «Palisade», «Santa Fe» جانە «Mufasa» سەكىلدى مودەلدەرىنىڭ قۇرىلعىلارىن ءوزىمىزدىڭ الماتى قالاسى مەن الماتى وبلىسىنان شىققان ماماندار جاساپ جاتىر. جوسپار بويىنشا «Astana Motors Manufacturing Kazakhstan» مۋلتيبرەندتى زاۋىتى (الماتى) دا ءوزىنىڭ اۆتوكولىك وندىرىسىندە «Kazakhstan Mobility Engineering» كاسىپورنى شىعارعان مۋلتيمەديالىق جۇيەلەردى قولداناتىن بولادى.
50 مىڭ «Hyundai» كولىكتەرىن وندىرەدى
«Astana Motors» كومپانياسىنىڭ «Hyundai Trans Kazakhstan» ەنشىلەس كاسىپورنى – «Hyundai» جەڭىل اۆتوكولىكتەرىن وندىرەتىن تولىق تسيكلدى زاۋىت. ءوندىرىس قۋاتى جىلىنا 50 مىڭ اۆتوكولىك شىعارۋعا جەتەدى. 2025 جىلدىڭ سوڭعى 10 ايىندا 43 665 اۆتوكولىك شىعارىلىپتى. جالپى 2020 جىلدان باستاپ كاسىپورىن 209 437 اۆتوكولىك وندىرگەن ەكەن.
قازىر مۇندا «Hyundai» برەندىنىڭ «Tucson», «Mufasa», «Sonata», «Elantra», «Santa Fe», «Palisade», «Staria», «Custin» جانە پرەميۋم ساناتىنداعى «Genesis» برەندىنىڭ ءتورت مودەلى شىعارىلادى. 2020 جىلدان بەرى كاسىپورىن ماماندارى «Hyundai Accent», «Hyundai Tucson», «Hyundai Santa Fe» مودەلدەرىن دانەكەرلەۋ مەن بوياۋ ۇساق ءتۇيىندى ءوندىرۋ (CKD) ادىسىمەن 1000-نان اسا وپەراتسيانى مەڭگەرىپتى.
