درون باسقارۋعا ارنالعان كەشەندى كۋرستى «Ashyq Aspan Foundation» عىلىمي ءبىلىم قوعامدىق قورىنىڭ ماماندارى وتكىزدى. العاشقى كەزەڭدە جاۋىنگەرلەر سيمۋلياتورلاردا جاتتىعىپ, وقۋ-دروندارىن باسقارۋدى مەڭگەردى. ەكىنشى كەزەڭدە قاتىسۋشىلار درونداردىڭ قۇرىلىمىن زەرتتەپ, اقاۋلارىن جوندەۋدى ۇيرەندى. ودان سوڭ ارنايى دايىندالعان توپ FPV دروندارىن كۇردەلى وپەراتسيالاردا قولدانۋ ادىستەرىن, مانەۆر جاساۋ تاكتيكاسى مەن انتيدرون جۇيەلەرىمەن ءوزارا ارەكەت ەتۋ تاسىلدەرىن زەرتتەدى.
وقۋعا قاتىسقان «بارىس» لاقاپ اتتى جاۋىنگەر تاجىريبەنىڭ ماڭىزىن ەرەكشە اتاپ ءوتتى.
ء«بىز بۇل جولى شاعىن ءارى اسا جىلدام FPV دروندارىن قولدانۋدى ۇيرەندىك. مۇنداي ۇشۋ اپپاراتتارى تاپسىرمانى ورىنداۋعا قولايلى. اسىرەسە, نىسان ءىشىن بارلاۋ, ءتىنتۋ جانە تەكسەرۋ كەزىندە تاپتىرماس قۇرال», دەيدى ول.
سونداي-اق, قاتىسۋشىلار اراسىندا FPV tinywoop سايىسى وتكىزىلدى. مۇندا ولار وقىپ-ۇيرەنگەندەرىن كورسەتتى. ۇزدىك شىققاندارى ماداقتامالارمەن ماراپاتتالدى. الداعى ۋاقىتتا كۋرستى جالعاستىرۋ جوسپارلانىپ وتىر. كەلەسى جولى جاۋىنگەرلەر FPV درونداردى تولىعىمەن وزدەرى قۇراستىرىپ, تەحنيكالىق جوندەۋدى تەرەڭىرەك مەڭگەرمەك.
ايتا كەتسەك, بيىلدان باستاپ ءىىم ۇلتتىق ۇلاننىڭ 5573 اسكەري بولىمىندە درون وپەراتورلارىن دايارلاۋ كۋرسى ىسكە قوسىلدى. بۇل ساربازدارعا زاماناۋي اسكەري-قولدانبالى داعدىلاردى مەڭگەرىپ, سۇرانىسقا يە ماماندىقتى يگەرۋگە مۇمكىندىك بەرەدى.
