دەلەگاتسيا قۇرامىندا 15 قاتىسۋشى بار. ولار بىلىكتىلىگىن ارتتىرۋدى كوزدەگەن وبلىستىڭ قوعامدىق كەڭەس مۇشەلەرى مەن ۇكىمەتتىك ەمەس ۇيىم وكىلدەرى. سونىڭ ءبىرى – ماڭعىستاۋ وبلىسى مۇنايلى اۋداندىق قوعامدىق كەڭەس مۇشەسى رايحان مۋساەۆا.
– ءبىرىنشى كۇنى دەپۋتاتتار مەن قوعامدىق كەڭەس مۇشەلەرىنە ساراپشى گۇلميرا قورعانباەۆا «ايماقتاردىڭ ستراتەگيالىق دامۋى» تاقىرىبىندا ترەنينگ وتكىزدى. جيىندا ايماقتىق ستراتەگيانى ءتيىمدى جوسپارلاۋداعى نەگىزگى تاسىلدەر تالقىلاندى. تولعاندىرعان ساۋالدارىمىزدى قويىپ, وي-پىكىرمەن بولىستىك. كەيىن مادەنيەت جانە اقپارات مينيسترلىگى وكىلدەرىمەن جۇزدەسىپ, مەملەكەتتىك ساياساتتىڭ وزەكتى باعىتتارى, ازاماتتىق قوعامدى قولداۋ تەتىكتەرى مەن قوعامدىق كەڭەستەردىڭ قىزمەتى جايىندا كەڭ كولەمدە اقپارات الدىق. وسى كەزدەسۋلەردىڭ ناتيجەسىندە دامۋ جوسپارىن قۇرۋ ءۇشىن كومانداعا ءتۇرلى ماشىق پەن قابىلەتى بار ءتورت تيپتەگى ماماندى تارتۋ قاجەتتىگىن ءتۇسىندىم, – دەدى ر.مۋساەۆا.
جوبا ماڭعىستاۋ وبلىسىنىڭ اقپارات جانە قوعامدىق دامۋ باسقارماسىنىڭ تاپسىرىسىمەن «ماڭعىستاۋ وبلىسى ازاماتتىق اليانسى» زتب ۇيىمداستىرعان. ماقسات – ءوڭىردىڭ بەلسەندىلەرىن قولداۋ, ازاماتتىق قوعام ينستيتۋتىن نىعايتۋ جانە قوعام مەن مەملەكەتتىك ورگاندار اراسىنداعى جۇيەلى بايلانىس ورناتۋ.
قاتىسۋشىلار ەكىنشى كۇنى قازمەديا ورتالىعىنا بارىپ, 22 قاباتتى تەلەورتالىق عيماراتىن ارالادى. ستۋديالاردىڭ جۇمىسىن كورىپ, ورتالىق كوممۋنيكاتسيالىق قىزمەتىنىڭ بريفينگتەرى وتەتىن الاڭعا باردى. ودان كەيىن سەنات دەپۋتاتتارىمەن جۇزدەستى. ەرتەڭىنە ءماجىلىس دەپۋتاتتارىمەن كەزدەسىپ, زاڭ شىعارۋ ۇدەرىسى, قوعاممەن كەرى بايلانىس ورناتۋ جونىندە اڭگىمەلەستى. ءوڭىر بەلسەندىلەرى «قازاقستان حالقىنا» قورىنىڭ باعدارلامالارى, الەۋمەتتىك جوبالاردى قولداۋ جانە وڭىرلىك باستامالارىمەن تانىستى.
– تۋر كەزىندە ۇيىمداستىرىلعان ءىس-شارالار قاتىسۋشىلاردىڭ كاسىبي ساۋاتىن ارتتىرۋعا, حالىقپەن ەتەنە بايلانىسىن كۇشەيتۋگە, ازاماتتىق بەلسەندىلىگىن شىڭداي تۇسۋگە باعىتتالعان. مۇنداعى 15 ادام ءتۇرلى باعىتتا ەڭبەك ەتەدى. ارالارىندا مۇعالىمدەر, مەديتسينا قىزمەتكەرلەرى دە بار. بىراق ءبارىمىزدى بىرىكتىرەتىن ورتاق ۇستانىم – ەلگە قىزمەت ەتۋ, قوعامعا پايدالى بولۋ, وڭتايلى ءارى ءتيىمدى جۇمىس جۇيەسىن قالىپتاستىرۋ, – دەدى ماڭعىستاۋ وبلىسى قوعامدىق كەڭەسىنىڭ مۇشەسى قايىرعالي قالمۇقانوۆ.
