قوستاناي. 23 اقپان. قوستانايداعى ە.ومىرزاقوۆ اتىنداعى فيلارمونيادا كورەي دياسپوراسى وزدەرىنىڭ جاڭا جىل (سوللال) مەرەكەسىن اتاپ ءوتتى. وسى مەرەكە اياسىندا دياپورا وكىلدەرى جارمەڭكە جانە كونتسەرت ۇيىمداستىردى. بۇل تۋرالى ng.kz حابارلادى.
فيلارمونيا فويەسىندە كورەي حالقىنىڭ ۇلتتىق كوستيۋمىن كيگەن قىزدار قوناقتاردى قارسى الدى. كورەي اسحاناسى ەرەكشە سالاتتارىمەن, ءدامدى تاعامدارىمەن ەرەكشەلەنەدى. سونىمەن قاتار, وسى جولى كورەي دياسپوراسى وكىلدەرى حالىقتىق ورنەگى بار بۇيىمدارمەن جانە شىعىس نازىكتىگىن بەينەلەگەن سۋرەتتەرمەن كەلۋشىلەردى تاڭقالدىردى. قۇرىلعانىنا 15 جىل تولعان «ەن كودي» ءانسامبلى ءان اۋەلەتتى.
كورەي دياسپوراسى باسقارماسىنىڭ مۇشەسى لاريسا تسحاي: «كورەي جاڭا جىلى تۋىستىق قارىم-قاتىناستى ساقتاۋ ءداستۇرىن دارىپتەيدى. بۇل مەرەكەدە تۋىستار اتا-اناسىنىڭ نەمەسە وتباسىندا ۇلكەن باۋىردىڭ ۇيىنە جينالادى. مەرەكەگە دايىندىق ءبىر اي بۇرىن باستالادى, ويتكەنى كورەي اسحاناسى كۇردەلى, تاعامداردى دايىنداۋ ۇزاق ەڭبەكتى قاجەت ەتەدى. ءبىزدىڭ حالىقتىڭ سەنىمى بويىنشا وسى كۇنى ولگەندەر ءبىرشاما ۋاقىتقا جەرگە قايتا كەلەدى, تاماقتان اۋىز تيەدى دەپ ەسەپتەلەدى. سول ءۇشىن ستولدىڭ ۇستىندە كەمىندە 20 ءتۇرلى تاعام بولۋى ءتيىس. اسىرەسە, مەرەكە داستارحانى كۇرىشتەن جاسالعان تتوككۋك سورپاسىنسىز بولمايدى. وسى سورپانى ىشكەن كىسى ءبىر جاسقا ءوستى دەپ ەسەپتەلەدى. ونى دەنساۋلىعى جاقسى بولۋى ءۇشىن بالالارعا بەرەدى», دەدى.
سوللال وتباسىلىق مەرەكە سانالادى. بۇل كۇنى اتا-اناسىمەن قاتار, قايتقان تۋىستارىنىڭ رۋحىنا تاعزىم ەتەدى. مەرەكەدە ادامدار ءبىرىن ءبىرى قۇتتىقتايدى, بالالار ۇلكەندەرگە سالەم بەرىپ, ولاردىڭ باتاسىن, سىيلىعىن الادى. كەشتەتىپ تۋىستار كوشەگە شىعىپ, قاعازدان جاسالعان جىلاندار ۇشىرادى.
ءنازيرا جارىمبەتوۆا.
دەرەك, سۋرەت: ng.kz.
