تاۋ-كەن ءىسىنىڭ دامۋىنا نە كەدەرگى؟

ەلىمىزدە گەولوگيالىق بارلاۋ سالاسى ءبىر مەزەتتە ەكىۇداي جاعدايدا تۇر. ءبىر جاعىنان, ول تاۋ-كەن جانە مەتاللۋرگيا كەشەنىنىڭ, جالپى العاندا, شيكىزاتتىق ەكونوميكانىڭ نەگىزى. ەكىنشى جاعىنان, سالادا قوردالانعان تۇيتكىلدەر جەتەرلىك. ولاردىڭ قاتارىندا گەولوگيالىق دەرەكتەردى تسيفرلاندىرۋ, الەۋەتتى ينۆەستورلار ءۇشىن اشىق ءارى تۇسىنىكتى اقپاراتتىق جۇيە قالىپتاستىرۋ جانە ەڭ باستىسى, بار جانە جاڭا جوبالارعا ينۆەستيتسيا تارتۋ ماسەلەسى بار.

سوڭعى جىلدارى بىرقاتار وڭىردە ءتۇستى مەتالل كەن ورىندارىنىڭ سارقىلۋ ءۇردىسى بايقالىپ وتىر.

ايتالىق مەملەكەتتىڭ 2029 جىلعا دەيىنگى ۇلتتىق دامۋ جوسپارىنا سايكەس, دايىن مىس قورى اشىق ادىسپەن 10-12 جىل ىشىندە تاۋسىلۋى مۇمكىن. تەمىر قورى 20-25 جىلعا عانا جەتەدى. ال جەر بەتىنە جاقىن جاتقان, قۇرامىندا حرومى مول كەندەر قازىردىڭ وزىندە تولىقتاي يگەرىلگەن. ەندىگى ءوندىرىس تەرەڭ قاباتتارعا اۋىسۋعا ءتيىس. بۇل ءوز كەزەگىندە جاڭا تەحنولوگيانى, قىمبات يننوۆاتسيانى جانە قوماقتى قارجىنى تالاپ ەتەدى.

مۇنداي ءۇردىس ۇزاق مەرزىمدە بىرقاتار قاتەرگە الىپ كەلۋى ىقتيمال. اتاپ ايتقاندا, بيۋدجەتكە تۇسەتىن سالىق تۇسىمدەرىنىڭ ازايۋى, مونوقالالاردىڭ الەۋمەتتىك-ەكونوميكالىق السىرەۋى سياقتى سالدارلار تۋىنداۋى مۇمكىن. بۇل قاۋىپتەر قازاقستاننىڭ گەولوگيالىق سالاسىن دامىتۋ تۇجىرىمداماسىندا 2023-2027 جىلدارعا ارنالعان قۇجاتتا دا اشىق ايتىلعان.

تاۋ-كەن مەتاللۋرگيا كەشەنىنىڭ دامۋىنا كەدەرگى كەلتىرىپ وتىرعان نەگىزگى فاكتورلاردىڭ ءبىرى گەولوگيالىق بارلاۋ دەڭگەيىنىڭ تومەندىگى. جوعارى اۋديتورلىق پالاتانىڭ ساراپشىلارى كەلتىرگەن دەرەكتەرگە سۇيەنسەك, ەلدەگى رۋدالىق قورلاردىڭ ەداۋىر بولىگى ناقتى بارلاۋ ەمەس, قاعاز جۇزىندەگى رەسۋرس سانالادى. 2022 جىلى گەولوگيالىق بارلاۋعا جۇمسالعان شىعىن ءبىر شارشى شاقىرىمعا شاققاندا نەبارى 63 اقش دوللارىن قۇراعان. ال بۇل كورسەتكىش الەمدىك كوشباسشى ەلدەردە سول كەزەڭدە 170-300 دوللار ارالىعىندا بولعان.

تاعى ءبىر ماسەلە, ەلىمىزدە بارلانعان قورلاردىڭ ەداۋىر بولىگى ساپاسى تومەن كەندەرگە جاتادى. مۇنداي رەسۋرستاردى ءتيىمدى ءارى تابىستى يگەرۋ ءۇشىن تەحنولوگيالىق جاڭاشىلدىق قاجەت. ال ول تىكەلەي ينۆەستيتسياعا كەلىپ تىرەلەدى. بۇعان قوسا, تاۋ-كەن مەتاللۋرگيا كەشەنى الەۋمەتتىك جاۋاپكەرشىلىگى جوعارى سالا. مۇندا تەك ESG قاعيداتتارى عانا ەمەس, وندىرىستىك قاۋىپسىزدىك تە شەشۋشى ءرول اتقارادى. قاۋىپسىزدىك پەن جاڭاشىلدىقسىز بۇل سالانىڭ ورنىقتى دامۋى مۇمكىن ەمەس.

جالپى, گەولوگيالىق بارلاۋ ماسەلەسى ەكونوميكانىڭ بولاشاعىنا تىكەلەي اسەر ەتەتىن ستراتەگيالىق باعىت رەتىندە قايتا قاراۋدى تالاپ ەتىپ وتىر. ينۆەستيتسيا, تەحنولوگيا جانە اشىقتىق قاتار جۇرمەيىنشە, سالانىڭ الەۋەتىن تولىق پايدالانۋ قيىن.