وتىرىستى اشقان ماۋلەن اشىمباەۆ ارىپتەستەرىن ەركىندىك پەن ەگەمەندىكتىڭ سيمۆولىنا اينالعان مەملەكەتتىك مەرەكە – تاۋەلسىزدىك كۇنىمەن قۇتتىقتادى.
ء«بىزدىڭ باستى ماقساتىمىز – مەملەكەتتىلىك پەن ۇلتتىق بىرلىكتى نىعايتۋ مەن ازاماتتاردى پرەزيدەنت قاسىم-جومارت توقاەۆتىڭ باستاماسىمەن جۇرگىزىلىپ جاتقان رەفورمالار توڭىرەگىنە توپتاستىرۋ. بۇل كۇندى ەل دامۋىنىڭ نەگىزگى جەتىستىكتەرى مەن سىن-قاتەرلەرىن تەرەڭ سارالايتىن ماڭىزدى كەزەڭ دەپ قابىلداعان ءجون», دەپ م.اشىمباەۆ مەملەكەت باسشىسىنىڭ ىشكى ساياسات ماسەلەلەرى بويىنشا جارلىعىنا سايكەس بۇل باعىتتاعى نەگىزگى قاعيدالارعا, قۇندىلىقتارعا جانە باسىمدىقتارعا توقتالدى.
بەكىتىلگەن كۇن تارتىبىنە بايلانىستى سەناتورلار الداعى بەيسەنبىدە «قۇقىق بۇزۋشىلىق پروفيلاكتيكاسى تۋرالى» زاڭدى قارايدى. قۇجاتتا قۇقىق بۇزۋشىلىقتىڭ الدىن الۋ سالاسىندا ادام مەن ازاماتتىڭ قۇقىن, بوستاندىقتارى مەن زاڭدى مۇددەلەرىن قورعاۋدى جانە ساقتاۋدى قامتاماسىز ەتۋ, قۇقىقتىق ءتارتىپتى ساقتاۋ جانە نىعايتۋ جونىندە ماڭىزدى نورمالار بار. وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق بۇزۋشىلىق پروفيلاكتيكاسى جانە قازاقستان رەسپۋبليكاسى زاڭناماسىنىڭ جەكەلەگەن سالالارىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ دا قارالادى.
سونىمەن قاتار سەنات وتىرىسىنىڭ كۇن تارتىبىنە «جەر قويناۋى جانە جەر قويناۋىن پايدالانۋ تۋرالى» قازاقستان رەسپۋبليكاسىنىڭ كودەكسىنە مەملەكەت باسشىسىنىڭ تاپسىرمالارىن ىسكە اسىرۋ بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ شىعارىلدى. بۇل زاڭعا سايكەس گەولوگيالىق اقپاراتتىڭ اشىق دەرەكقورى بار سالانىڭ نەگىزگى تسيفرلىق ينفراقۇرىلىمى رەتىندە جەر قويناۋىن پايدالانۋدىڭ بىرىڭعاي پلاتفورماسىن بەكىتۋ ۇسىنىلادى. پلاتفورما قاتتى جانە كەڭ تارالعان پايدالى قازبالاردى بارلاۋ جانە ءوندىرۋ سالاسىنداعى بارلىق بيزنەس-ۇدەرىستى قامتيدى.
دەپۋتاتتار سونداي-اق مەملەكەت باسشىسىنىڭ تاپسىرمالارىن ورىنداۋ اياسىندا ازىرلەنگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسى كونستيتۋتسيالىق سوتىنىڭ شەشىمدەرىن ورىنداۋ جانە زاڭسىز يەمدەنىلگەن اكتيۆتەردى مەملەكەتكە قايتارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. اتالعان زاڭ ارقىلى سىبايلاس جەمقورلىققا قارسى ءىس-قيمىل, مەملەكەتتىك قىزمەت, زاڭسىز ساتىپ الىنعان اكتيۆتەردى مەملەكەتكە قايتارۋ, جەر پايدالانۋ قۇقىقتارىن مۇراگەرلىككە الۋ, سونداي-اق اليمەنتتىك مىندەتتەمەلەردى ورىنداۋ ماسەلەلەرىن رەتتەيتىن بىرقاتار زاڭنامالىق اكتىگە تۇزەتۋلەر ەنگىزىلەدى.
سونىمەن قاتار پالاتا وتىرىسىندا تاعى باسقا دا زاڭدار توپتاماسى قارالادى. ناقتى ايتقاندا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تاريحي-مادەني مۇرا وبەكتىلەرىن قورعاۋ جانە ءبىلىم بەرۋ-ساۋىقتىرۋ قىزمەتتەرى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى», «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ارحيۆ ءىسى جانە قۇقىققا قايشى كونتەنتتىڭ تارالۋىن شەكتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) وزگەرىس پەن تولىقتىرۋلار ەنگىزۋ تۋرالى» زاڭدار سەنات وتىرىسىنىڭ كۇن تارتىبىنە شىعارىلدى.
بۇعان قوسا پالاتا وتىرىسىندا الدىڭعى اپتادا سەناتورلار جولداعان «اۋىل – ەل بەسىگى» جوباسى اياسىندا قاراجاتتىڭ پايدالانىلۋىن ءتيىمدى باقىلاۋ جانە «ديپلوممەن – اۋىلعا!» باعدارلاماسىنىڭ جەكەلەگەن ەرەجەلەرىن قايتا قاراۋ تۋرالى دەپۋتاتتىق ساۋالدارعا پرەمەر-ءمينيستردىڭ ورىنباسارى قانات بوزىمباەۆ جاۋاپ بەرەدى. سەنات توراعاسى اتاپ وتكەندەي, ماسەلەنىڭ ماڭىزىن ەسكەرە وتىرىپ, تالقىلاۋعا ءماسليحات دەپۋتاتتارى مەن باسقا دا مۇددەلى مەملەكەتتىك ورگانداردىڭ وكىلدەرى قاتىسادى.
بيۋرودا دەپۋتاتتار ءماجىلىس قابىلداعان زاڭداردى جۇمىس ءۇشىن سەناتتىڭ تۇراقتى كوميتەتتەرىنە ءبولىپ بەرىپ, سەناتورلاردىڭ 26 جەلتوقسان مەن 11 قاڭتار ارالىعىندا وڭىرلەردە وتەتىن كوشپەلى وتىرىستارى مەن كەزدەسۋلەرىنە قاتىستى ماسەلەلەر تالقىلاندى.
