تسيفرلىق ساۋاتتىلىقتى جەتىلدىرەتىن باستاما

جاساندى ينتەللەكت جانە تسيفرلىق دامۋ مينيسترلىگىنىڭ مالىمەتىنە سۇيەنسەك, وتكەن جىلدان بەرى پورتالدارعا 1 ميلليوننان استام پايدالانۋشى كىرىپ, 71 مىڭنان استام ادام وقىتۋ كۋرستارىن تولىق اياقتاعان.

سونىمەن قاتار CitizenSec.kz پلاتفورماسىندا مەملەكەتتىك قىزمەتشى­لەرگە ارنالعان وقىتۋ جۇرگىزىلەدى. بۇگىنگى كۇنى كۋرستاردى 5 مىڭ تىڭداۋشى ءساتتى ءتامامدادى.

Nomadguard.kz پورتالى ازا­ماتتارعا جەكە دەرەكتەردىڭ تارالۋىن انىقتاۋعا, سونداي-اق كۇماندى سىل­تەمەلەر مەن سايتتاردى فيشينگ جانە باسقا دا كيبەرقاۋىپتەرگە تەكسەرۋگە مۇم­كىندىك بەرەدى. پورتال ارقىلى پايدالانۋ­شىلار ءوز جەكە مالىمەتتەرىنىڭ تارالۋى بولعان-بولماعانىن, قانداي رەسۋرستاردان تاراعانىن جانە قانداي كولەم­دە دەرەكتەردىڭ بۇزىلعانىن بىلە الادى. پورتال ىسكە قوسىلعان ساتتەن باستاپ Nomadguard.kz پلاتفورماسىندا 608 مىڭ ازامات تىركەلىپ, 6 مىڭنان استام سىلتەمە قاۋىپسىزدىك ماقساتىندا تەكسەرىلدى.

Citizensec.kz جانە nomadguard.kz پورتالدارى ازامات­تارعا ينتەرنەتتەگى قاۋىپتەردى جاقسى تۇسىنۋگە, ءوز دەرەكتەرىن قورعاۋدى ۇيرەنۋگە جانە الاياقتاردىڭ قۇربانى بولماۋعا كومەكتەسەدى. بۇل – ءاربىر پايدالانۋشىنىڭ جانە ەلدىڭ قاۋىپسىزدىگىنە قوسىلعان ماڭىزدى ۇلەس.

حالىقتىڭ تسيفرلىق ساۋاتىن ارتتىرۋ جانە كيبەرگيگيەنا مادەنيەتىن قالىپتاستىرۋ ماقساتىندا قازىرگى ۋاقىتتا كيبەرقاۋىپسىزدىك ەرەجەلەرىن ساقتاۋعا ۇندەيتىن اقپاراتتىق ماتەريالدار مەن ۆيزۋالدى باننەرلەردى سىرتقى تسيفرلىق ەكراندار مەن بيلبوردتاردا ورنالاستىرۋ مۇمكىندىگى قاراستىرىلىپ جاتىر.

كوپشىلىك جينالاتىن ورىنداردا كيبەرگيگيەناعا ارنالعان الەۋمەتتىك جارنامانى ورنالاستىرۋ ازاماتتاردى كەڭىنەن اقپاراتتاندىرۋعا جانە جەكە دەرەكتەردى قورعاۋ بويىنشا الدىن الۋ شارالارىن كۇشەيتۋگە مۇمكىندىك بەرەدى.

سونىمەن قاتار جاقىندا eGov mobile ءموبيلدى قوسىمشاسىندا Citizensec.kz پورتالىنىڭ كيبەرگيگيەنا بويىنشا كۋرس­تارى, سونداي-اق تسيفرلىق قاۋىپسىزدىك­كە ارنالعان نەگىزگى ماتەريالدار مەن پراكتيكالىق ۇسىنىمدار جيناقتالعان تاقىرىپتىق جۋرنال قولجەتىمدى بولدى.

وسى رەتتە ەلىمىز الەمدەگى العاشقى ەلدەردىڭ ءبىرى بولىپ كەلەسى جىلدىڭ اقپان ايىنان باستاپ «SpaceX» كومپانياسىنىڭ Direct-to-Cell (D2C) سپۋتنيكتىك بايلانىس تەحنولوگياسىن كەزەڭ-كەزەڭىمەن ەنگىزۋدى باستايتىنىن ايتا كەتكەنىمىز ءجون.

وسى كۇزدە پرەزيدەنت قاسىم-جومارت توقاەۆتىڭ امەريكا قۇراما شتاتتارىنا بارعان رەسمي ساپارى بارىسىندا ماڭىزدى كەلىسسوزدەر ءوتىپ, ەلىمىزگە الەمدىك وزىق تەحنولوگيالارعا جول اشاتىن بىرقاتار قۇجاتتارعا قول قويىلعان-دى. سولاردىڭ ءبىرى «Starlink» كومپانياسىنىڭ Direct to Cell سپۋتنيكتىك بايلانىس تەحنولوگياسىن ەنگىزۋ تۋرالى كەلىسىم ەدى.

جۋىردا پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, «Beeline قازاقستان» كومپانياسىنىڭ پرەزيدەنتى ەۆگەني ناسترادين جانە «SpaceX (Starlink)» كومپانياسىنىڭ وكىلدەرى ورتالىق ازيادا العاش رەت Direct-to-Cell تەحنولوگياسىن سىناقتان ءساتتى وتكىزدى.

سىناق كەزىندە Starlink سپۋتنيكتىك جەلىسى مەن Beeline قازاقستاننىڭ جەرۇستى ءموبيلدى جەلىسى بىرىكتىرىلىپ, قاراپايىم ۇيالى تەلەفون ارقىلى SMS-حابارلامالار مەن مەسسەندجەر ارقىلى قوڭىراۋلار ءساتتى جىبەرىلدى.

سپۋتنيكتىك بايلانىس توڭىرەگىندەگى بۇل جاعىمدى جاڭالىق وسى سالاداعى اقپاراتتىق تەحنولوگيالاردىڭ العا باسۋى­نا مۇمكىندىك اشىپ, حالىقتىڭ تسيفرلىق ساۋاتىن ارتتىرا تۇسۋىنە جانە تسيفرلىق پلاتفورمالاردىڭ ءتيىمدى جۇمىس ىستەۋىنە سەپتىگىن تيگىزبەك.