اتالعان ەلەمەنت العاش رەت 2014 جىلى قازاقستان مەن قىرعىزستاننىڭ بىرلەسكەن ۇسىنىسىمەن تىزىمگە ەنگەن. ەندى كەڭەيتىلگەن نۇسقا كيىز ءۇيدى الەمدىك مادەني مۇرانىڭ اجىراماس بولىگى رەتىندە تانىتۋ مۇمكىندىگىن ارتتىرىپ, ورتالىق ازيا حالىقتارىنىڭ ورتاق مۇراسىنا اينالعانىن ايعاقتايدى.
«قازاقستان بۇعان دەيىن يۋنەسكو-نىڭ ماتەريالدىق ەمەس مادەني مۇرالارىنىڭ رەپرەزەنتاتيۆتى تىزىمىنە 14 اتالىمدى ەنگىزگەن. بۇل كورسەتكىش بويىنشا ەلىمىز الەمنىڭ 183 مەملەكەتى ىشىندە ۇزدىك 25 ەلدىڭ قاتارىنا كىرەدى», دەدى ەرلان قارين.
قازىرگى ۋاقىتتا ءبىزدىڭ ەلدىڭ بىرنەشە جاڭا ءوتىنىمى يۋنەسكو قاراۋىندا تۇر. اتاپ ايتساق, «سالبۋرىن» ۇلتتىق ءداستۇرى, «كەستە تىگۋ ونەرى» (قازاقستان, وزبەكستان, تاجىكستان), «كيىز باسۋ ونەرى» (قازاقستان, قىرعىزستان, ازەربايجان, يران, موڭعوليا, تاجىكستان, تۇركيا, وزبەكستان), «الپامىس جىرى» (قازاقستان, ازەربايجان, تۇرىكمەنستان, تۇركيا, وزبەكستان), «تاقيا» ءداستۇرى (قازاقستان, تۇرىكمەنستان, ازەربايجان, قىرعىزستان, تاجىكستان, وزبەكستان, تۇركيا).
بۇل اتالىمداردىڭ يۋنەسكو تىزىمىنە ەنۋى قازاق مادەنيەتى مەن ورتالىق ازيانىڭ ورتاق مۇراسىنا حالىقارالىق دەڭگەيدە جاڭا مارتەبە بەرەرى انىق.
