باتىس قازاقستاندا مۇناي ۇرلاعاندارعا ۇكىم شىقتى

ورال. 22 اقپان. باتىس قازاقستان ايماعىندا مۇناي ءوندىرۋ ىسىمەن اينالىساتىن «جايىق مۇناي» جشس يەلىگىندەگى قۇبىردان ءىرى كولەمدە مۇناي ۇرلانعانى بەلگىلى بولىپ وتىر. بۇل تۋرالى egemen.kz ءتىلشىسى حابارلادى. بۇل وتاندىق فيرماعا قاراستى قۇبىردان جىمقىرىلعان ستراتەگيالىق شيكىزات مەنشىك يەلەرىنە 42 ميلليون 500 مىڭ تەڭگە زالال كەلتىرگەن. وسىعان وراي ورال قالالىق سوتى جىمىسقى ارەكەتتى ىسكە اسىرعان يۋ.كوزلوۆقا قاتىستى ۇكىمدى جاريا ەتتى. ءتيىستى قۇقىق قورعاۋ ورگاندارىنان تۇسكەن دەرەكتەرگە قاراعاندا ول تاعى ءبىر مۇناي ۇرلاۋدى كاسىپ ەتكەن ك.بورانباەۆپەن بىرگە ءوزارا قىلمىستىق توپ قۇرىپ, سەرىكتەستىككە قاراستى مۇناي ونىمدەرىن ەشقانداي قۇجاتسىز ەلمىزدىڭ وزگە وڭىرلەرىنە جونەلتىپ وتىرعان. ولاردىڭ بۇل قىلمىستارى اشكەرلەنىپ, ءتيىستى قىلمىستىق جازاعا تارتىلدى. اتاپ ايتقاندا, يۋ.كوزلوۆ قىلمىستىق كودەكستىڭ ءتيىستى بابى مەن تارماعىنا سايكەس مۇلكى تاركىلەنىپ, 6 جىلعا باس بوستاندىعىنان ايىرىلدى. ونىڭ سىبايلاسى ك.بورانباەۆقا دا جازا بەلگىلەندى. ول ءۇش جىل جەتى اي مەرزىمگە سوتتالدى. ەندىگى جەردە ەكەۋى دە جازالارىن جالپى تارتىپتەگى تۇزەۋ كولونياسىندا وتەيدى. ۇرلانعان مۇناي ونىمدەرى ءۇش اۆتوكولىكپەن تاسىمالدانعان. ءىس بارىسىندا بۇل كولىك قۇرالدارى دا تاركىلەندى. سوت تالقىسى كەزىندە ك.بورانباەۆتان 8 ملن. 500 مىڭ تەڭگە اقشا تابىلدى. مەملەكەتتىك ايىپتاۋشىنىڭ ءوتىنىشى بويىنشا بۇل قوماقتى سوما دا مەملەكەت پايداسىنا ەنگىزىلدى. سوت ۇكىمى زاڭدى كۇشىنە ەنگەن جوق. تەمىر قۇسايىن. دەرەك, سۋرەت: egemen.kz.