كەنتتەگى «جەڭىس» ساياباعىنا جينالعان حالىق سوعىستا قازا تاپقان جەرلەستەرىنىڭ ەسىمدەرى جازىلعان ەسكەرتكىش پەن «ماڭگىلىك الاۋعا» گۇل شوقتارىن قويىپ, ءبىر مينۋت ۇنسىزدىكپەن ەسكە الدى. بۇل تۋرالى egemen.kz حابارلادى. اۋدان اكىمى باحىت جاحانوۆ بارشا حالىقتى مەرەكەمەن قۇتتىقتاپ, بۇگىنگى بەيبىت زامان ءۇشىن ارداگەرلەرگە العىس ءبىلدىردى. «ازاماتتىق اردى تۋ ەتىپ, ەرەن ەرلىكتىڭ ۇلگىسىن كورسەتكەن جەڭىس كۇنىنىڭ اۆتورلارىنا ءاردايىم قامقورلىق جاساۋ – پەرزەنتتىك پارىزىمىز. ۇلى وتان سوعىسى ارداگەرلەرى مەن تىل ەڭبەككەرلەرىنە الەۋمەتتىك قولداۋلار تەك جەڭىس مەرەكەسىندە عانا ەمەس, ۇنەمى جۇرگىزىلەدى. ەرلىك پەن قايسارلىقتىڭ ۇلگىسى بولعان ارداگەرلەرگە دەگەن قۇرمەت ەشقاشان ازايمايدى», – دەدى اۋدان اكىمى. سونىمەن قاتار, سوعىس ارداگەرى, «ەرەن ەڭبەگى ءۇشىن» مەدالىنىڭ يەگەرى ءپىرنازار مىرزاتاەۆ جاس ۇرپاققا بەيبىت ءومىر مەن تىنىشتىق تىلەيتىنىن جەتكىزدى. ودان ءارى جەرگىلىكتى ونەرپازدار وتتى جىلداردا جاۋىنگەرلەرگە جىگەر بەرگەن اندەردى ورىنداپ, مەرەكەلىك كوڭىل-كۇي سىيلادى. ايتا كەتەيىك, قازالى اۋدانىنان ۇلى وتان سوعىسىنا 10 مىڭنان استام ادام اتتاندى. سولاردىڭ 6 000-نان استامى سوعىس دالاسىندا قازا تاۋىپ, حابار-وشارسىز كەتكەن. ال قالعان 4 000-نان استام ارداگەرلەر ەلگە امان-ەسەن ورالدى. قازىرگى تاڭدا اۋداندا 9 ۇلى وتان سوعىسىنىڭ ارداگەرى مەن 900-دەن استام تىل ەڭبەككەرى بار. اۋداندا ەلباسىنىڭ تاپسىرماسىمەن ۇلى وتان سوعىسى ارداگەرلەرى مەن تىل ەڭبەككەرلەرىنە الەۋمەتتىك قولداۋلار لايىقتى كورسەتىلۋدە. سونداي-اق, جەڭىستىڭ 70 جىلدىعى قارساڭىندا اۋدان بويىنشا بىرقاتار يگى جۇمىستار اتقارىلدى. سول ماقساتتا 100 ملن.-عا جۋىق تەڭگە ءبولىندى.
ەلامان قوڭىر. دەرەك, سۋرەت: egemen.kz.
