سۋرەتتى تۇسىرگەن – اۆتور
شىعىستىڭ ەرەكشەلىگى سول, جىل ون ەكى اي بويى تابيعاتتا تىنىعۋعا مۇمكىندىك مول. جۇمىستان قولىڭىز قالت ەتسە بولدى, ءبىر ساعاتتىق جەردەن-اق تۇمسا تابيعاتقا ەنەسىز دە كەتەسىز. كۇن قىسقا دەسەڭىز, سىرعاناۋ جولاعىنىڭ شامدارى سامالاداي جارقىراپ تۇرادى. جاداعاي جوتادان اياققا شاڭعىنى كەشە بايلاعان ادام دا وپ-وڭاي سىرعاناپ تۇسەدى. ايتقاندايىن, مۇندا ازيانىڭ ەكى دۇركىن چەمپيونى يۋليا گالىشەۆا دا جاتتىعادى. بالا-شاعاعا ارنالعان جەكە سىرعاناق تا قاراستىرىلعان. مۇنداي مۇمكىندىكپەن تۋريستەردى مىڭداپ تارتۋ كەرەك دەيدى قىتايدان كەلگەن قوناقتار.
– وسكەمەندە ءبىرىنشى رەت بولۋىم, قىتايدىڭ شاۋەشەگىنەن كەلدىم. ءبىزدىڭ جاقتا دا وسىنداي شارالار كوپ وتەدى. قازاقستانداعى, اتامەكەنىمدەگى مۇنداي كوڭىلدى شاراعا قاتىسقانىما شىن جۇرەكتەن قۋانىپ تۇرمىن. سىزدەر دە قىتايدا وتەتىن قار مەرەكەسىن كورىپ قايتۋلارىڭىزعا بولادى, – دەيدى قانداسىمىز ايدانا مۇرال.
ايتارى جوق, شىعىستىڭ تابيعاتى ەرەكشە. تومەنگە قاراي سوزىلعان شاڭعى جولاعى جاتىر. اينالاسى اسپانعا شانشىلا وسكەن جاسىل شىرشا, سىڭسىعان ورمان. بەينە ءبىر ەرتەگى الەمىنە ەنگەندەي بولاسىز. وسىنداي سۇلۋلىققا تامسانا, شاڭعىمەن زۋلاپ بارا جاتۋ ءبىر عانيبەت. شاڭعى ماۋسىمى ناۋرىزعا دەيىن جالعاسادى.
شىعىس قازاقستان وبلىسى,
گلۋبوكوە اۋدانى
