ءىس-شارا بارىسىندا وبلىس باسشىسىنىڭ ورىنباسارى مادەنيەت قىزمەتكەرلەرىنىڭ جەتىسۋ ءوڭىرىنىڭ ونەرى مەن رۋحاني ءومىرىن دامىتۋعا قوسىپ وتىرعان ەڭبەگىنە ەرەكشە توقتالدى. ونىڭ ايتۋىنشا, سالا ماماندارىنىڭ الاڭسىز ءارى ساپالى جۇمىس ىستەۋىنە جاعداي جاساۋ, مادەنيەت نىساندارىنىڭ ماتەريالدىق-تەحنيكالىق الەۋەتىن كەزەڭ-كەزەڭىمەن كۇشەيتۋ – جەرگىلىكتى بيلىكتىڭ باسىم باعىتتارىنىڭ ءبىرى. وسى ماقساتتا مادەنيەت ۇيىمدارىنىڭ اۆتوپاركى شاعىن اۆتوبۋستار مەن جۇك كولىكتەرىمەن تولىقتىرىلىپ وتىر. جاڭا تەحنيكالار شىعارماشىلىق ۇجىمداردىڭ گاسترولدىك ساپارلارىنا شىعۋىنا, قۇرال-جابدىقتار مەن ساحنالىق دەكوراتسيالاردى تاسىمالداۋىنا, ءتۇرلى فەستيۆالدەر مەن بايقاۋلارعا بەلسەندى قاتىسۋىنا مۇمكىندىك بەرمەك.
اتالعان كۇنى وبلىستاعى 8 اۋداندىق جانە 2 قالالىق مادەنيەت ۇيىنە, ساكەن سەيفۋللين اتىنداعى وبلىستىق امبەباپ كىتاپحاناعا, وبلىستىق ارحيۆكە, كوركەمسۋرەت گالەرەياسى مەن حالىق شىعارماشىلىعى ورتالىعىنا بارلىعى 13 «گازەل» ماركالى شاعىن اۆتوبۋس پەن 1 جۇك كولىگى تاپسىرىلدى.
جاڭا تەحنيكانى العان مەكەمەلەر اتىنان الاكول اۋداندىق زەينەپ قويشىباەۆا اتىنداعى مادەنيەت ءۇيىنىڭ ديرەكتورى وتان سماعۇلوۆ ءسوز سويلەپ, مادەنيەت سالاسىنا كورسەتىلىپ وتىرعان قولداۋعا ريزاشىلىعىن ءبىلدىردى. ونىڭ ايتۋىنشا, ءبىر كۇندە وسىنشاما اۆتوكولىكتىڭ مادەنيەت نىساندارىنا بەرىلۋى – ءوڭىر تاريحىنداعى ەرەكشە وقيعا. بۇل ۇلتتىق قۇندىلىقتاردى دارىپتەپ جۇرگەن ونەر قىزمەتكەرلەرىنە كورسەتىلگەن ناقتى قامقورلىق ءارى شىعارماشىلىق سەرپىن بەرەتىن ماڭىزدى قادام. سونداي-اق ول الاكول اۋدانىندا ءتورت جاڭا مادەنيەت نىسانىنىڭ سالىنىپ جاتقانىن, ولاردىڭ ءبىرى جاقىن ارادا پايدالانۋعا بەرىلەتىنىن اتاپ ءوتتى.
ايتا كەتەيىك, بۇل يگى باستاما بيىل ەكىنشى جىل قاتارىنان وتكەن «جەر جانناتى – جەتىسۋ» وبلىستىق تەلەۆيزيالىق بايقاۋىنىڭ ماراپاتتاۋ ءراسىمى مەن گالا-كونتسەرتىمەن جالعاسىن تاپتى.
جالپى, جەتىسۋ وبلىسى قۇرىلعان ۋاقىتتان بەرى مادەنيەت سالاسىنىڭ ينفراقۇرىلىمى 36,2 پايىزعا جاڭارتىلدى. سوڭعى ءۇش جىلدا سالا مەكەمەلەرىنىڭ ماتەريالدىق-تەحنيكالىق بازاسىن نىعايتۋعا 1 ملرد تەڭگەدەن استام بيۋدجەت قاراجاتى ءبولىنىپ, مۋزىكالىق اسپاپتار, ساحنالىق كيىمدەر, كومپيۋتەرلىك تەحنيكا جانە وزگە دە قاجەتتى قۇرالدار ساتىپ الىندى. قازىرگى تاڭدا وڭىردە 300-دەن استام مادەنيەت جانە ارحيۆ مەكەمەسى حالىققا قىزمەت كورسەتىپ كەلەدى.
