فوتو: وبلىس اكىمدىگى
ءوڭىردىڭ دامۋىنا سەرپىن بەرەدى
جوبا «Zhanatas Chemical Complex» جشس تاراپىنان جۇزەگە اسىرىلادى. بۇل قازاقستانداعى حيميا ونەركاسىبىنىڭ جەتەكشىسى سانالاتىن «كازفوسفات» كومپانياسىنا ەنشىلەس قۇرىلىم. الەمدىك ستاندارتتارعا ساي تىڭايتقىش ءوندىرۋ ءۇشىن تمد ەلدەرىندە بالاماسى جوق كەندى تەرەڭ بايىتۋ تەحنولوگياسى ەنگىزىلەدى. بۇل تەحنولوگيا قاراتاۋ باسسەينىندەگى فوسفوريتتىك قوسپالار مولشەرىنىڭ جوعارى بولۋى سەكىلدى ماسەلەنى شەشۋگە مۇمكىندىك بەرەدى.
وبلىس اكىمدىگىنىڭ مالىمەتىنشە, جوبانى ىسكە اسىرۋ – ءوڭىر ءۇشىن الەۋمەتتىك-ەكونوميكالىق دامۋعا سەرپىن بەرەدى. جاڭا 1200 جوعارى بىلىكتى جۇمىس ورىندارىن قۇرۋ كوزدەلىپ وتىر. كادرلاردى دايارلاۋ ءۇشىن كومپانيانىڭ حالىقارالىق ارىپتەستەرى ازىرلەگەن وقىتۋ جۇيەسى, تاعىلىمدامالار مەن بىلىكتىلىكتى ارتتىرۋ باعدارلامالارى ۇيىمداستىرىلاتىن بولادى.
«جاڭا كەشەن قازاقستانداعى ءىرى حيميالىق ءوندىرىستىڭ جاڭا بۋىنىنا اينالادى. جاھاندىق نارىقتا ەلدى مينەرالدى تىڭايتقىشتاردى سەنىمدى ءوندىرۋشى جانە ەكسپورتتاۋشى رەتىندە ءرولىن نىعايتادى», دەدى «Zhanatas Chemical Complex» باس ديرەكتورى ەرجان مۋكانوۆ.
ينۆەستيتسيا 300 ملرد تەڭگەدەن اسادى
كەشەننىڭ جوباسى ازىرلەنىپ جاتىر. شيكىزاتتىڭ نەگىزگى كوزى رەتىندە «قىستاس» كەن ورنىن ءجىتى بارلاۋ ءىسى اياقتالدى. گاز تارتىپ, ەلەكترمەن جابدىقتاۋعا تەحنيكالىق شارتتار تولىق الىنعان. زاۋىتتى سۋمەن جابدىقتاۋ ءۇشىن «اقجار» جەراستى سۋلارى كەن ورنىن بارلاۋ جانە دالا جۇمىستارى جۇرگىزىلىپ جاتىر. بۇرعىلاۋ ءىسى جانە سىنامالى سۋ سورۋ جۇمىستارى اياقتالعان. سونىمەن قاتار حالىقارالىق EPC-مەردىگەرلەرىمەن كەلىسسوزدەر جۇرگىزىلىپ جاتىر. قۇرىلىس-مونتاجداۋ ءىسىن باستاۋ 2026 جىلدىڭ سوڭىندا جوسپارلانعان.
جوباعا سالىناتىن جالپى ينۆەستيتسيا كولەمى 300 ملرد تەڭگەدەن اسادى. قارجىلاندىرۋ تەتىگى رەتىندە «قازاقستان دامۋ بانكى» مەن وزگە دە كوزدەردەن قاراجات تارتۋ مۇمكىندىگى قاراستىرىلىپ جاتىر.
جاڭاتاس قالاسىنداعى كەشەن – شيكىزاتتى قايتا وڭدەۋدىڭ تولىق تسيكلىن قامتاماسىز ەتەتىن ءارى ينتەگراتسيالانعان وندىرىستىك تىزبەك قاعيداتى بويىنشا سالىنادى. ونىڭ قىزمەتى زاماناۋي اۋا تازارتۋ جۇيەسى مەن ەڭ وزىق تەحنولوگيالاردى پايدالانۋ ناتيجەسىندە حالىقارالىق ەكولوگيالىق ستاندارتتارعا تولىق سايكەستەندىرىلەدى.
