فوتو: ۇكىمەت
ول مەملەكەت باسشىسىنىڭ ينفراقۇرىلىمدى جاڭعىرتۋ بويىنشا قويعان مىندەتتەرىن جۇزەگە اسىرۋ تۇتىنۋشىلاردى گازبەن جابدىقتاۋ قىزمەتتەرىمەن قامتۋدى ارتتىرۋعا مۇمكىندىك بەرگەنىن ايتتى.
«حالىقتى گازبەن قامتۋ بويىنشا مەملەكەت باسشىسى تاپسىرعان الەۋمەتتىك مىندەتتەر جۇيەلى تۇردە شەشىلىپ جاتىر. تابيعي گاز شالعاي وڭىرلەردىڭ تۇرعىندارى ءۇشىن قولجەتىمدى يگىلىككە اينالىپ, ەلدەگى گازبەن قامتۋ دەڭگەيى 64,2%-عا جەتتى. 2025 جىلى 95 ەلدى مەكەندە 350 مىڭ ادام گازبەن قامتاماسىز ەتىلدى. بۇل ماقساتتارعا 112 ملرد تەڭگەدەن استام قارجى ءبولىندى», دەپ اتاپ ءوتتى ەرلان اقكەنجەنوۆ.
جۇمىستار گەوگرافياسى قازاقستاننىڭ بارلىق ايماعىن قامتىدى. اقمولا وبلىسىندا 100 مىڭنان استام تۇرعىن تۇراتىن قوسشى قالاسى مەن تالاپكەر اۋىلى گازبەن قامتىلدى. استانادا گازبەن قامتۋ دەڭگەيى شامامەن 97%-عا جەتىپ, ءىرى تۇرعىن الاپتارى قوسىلدى. جىل سوڭىنا دەيىن ۇركەر شاعىن اۋدانىندا گاز جەلىلەرىن تارتۋ جۇمىستارى تولىق اياقتالادى.
وڭتۇستىك وڭىرلەردى دامىتۋ جونىندەگى تاپسىرمالاردى ورىنداۋ بويىنشا تۇركىستان وبلىسىندا 100 مىڭ تۇرعىن گازبەن قامتۋ اياسىندا قۇنى 10 ملرد تەڭگەدەن استام جوبالار جۇزەگە اسىرىلدى. جەتىسۋ وبلىسىندا ۇزىندىعى 300 شاقىرىم «تالدىقورعان – ءۇشارال» ماگيسترالدى گاز قۇبىرى پايدالانۋعا بەرىلدى. جامبىل وبلىسىندا دا گاز قۇبىرلارىن جۇرگىزۋ جۇمىستارى بەلسەندى جۇرگىزىلۋدە.
باتىس قازاقستان وبلىسىندا «روستوشي – تايپاق» جوعارى قىسىمدى گاز قۇبىرىنىڭ قۇرىلىسى باستالدى, بۇل اقجايىق جانە تەرەكتى اۋداندارىنىڭ جىلدار بويعى گاز تاپشىلىعىن شەشۋگە مۇمكىندىك بەرەدى.
