گەننادي گولوۆكين 11-راۋندتا نوكاۋتپەن جەڭىسكە جەتتى

استانا. 22 اقپان. استانا ۋاقىتىمەن 5 ساعات 40 مينۋتتا قازاقستاندىق گەننادي گولوۆكين WBA جانە IBO ۆەرسيالارى بويىنشا چەمپيوندىق اتاعىن قورعاۋ ءۇشىن بريتانيالىق مارتين ميۋررەيمەن بولعان ۇرىستا 11-راۋندتا نوكاۋتپەن جەڭىسكە جەتتى. بۇل تۋرالى egemen.kz ءتىلشىسى حابارلادى. مونتە-كارلودا وتكەن «ۇلكەن بوكس كەشىندە» اتالمىش قارسىلاستار 04:45 ساعاتتا رينگكە كوتەرىلدى. ەسكە سالا كەتەيىك, بۇل كۇنى ءبىر-بىرىمەن تۇيدەي قۇرداس ەكى بوكسشى دا 32-ءشى مارتە شارشى الاڭداعى جەكپە-جەككە شىقتى. ءبىزدىڭ باعلان ادەتتەگىدەي ۇرىستىڭ باسىنان ونىڭ تىزگىنىن قولىنا ۇستادى. رينگ تورىندە ءبىرىنشى نومىرمەن ويناعان ونىڭ قيمىلدارى بارعان سايىن سەنىمدى بولا ءتۇستى. سونىڭ ىڭعايىندا گەنا قارسىلاسىن 4-راۋندتا ەكى رەت نوكداۋنعا جىبەردى. سودان كەيىن 10-راۋندتا دا بريتانيالىق جىگىت جەر سيپاپ قالدى. مۇنىڭ ەكەۋىندە دە ونى سول كەزدە سوعىلعان گونگ امان ساقتاپ قالدى. دەگەنمەن, 11-راۋندتا مارتين گەنانىڭ سوققىسىنان قۇتىلا المادى. بۇل جولى وتە قاتتى تيگەن جويقىن سوققى ونى ءبىرجولا تۇرالاتىپ تاستادى. نوكاۋت! وسىمەن گەننادي گولوۆكين ءوزىنىڭ 2015 جىلعى ماۋسىماشار شايقاسىن جەڭىسپەن اياقتاپ, جالپى ۇتىسىنىڭ سانىن 32-گە جەتكىزدى. بىلايشا ايتقاندا, بارلىق ايقاستارىندا تەك جەڭىسكە قول جەتكىزدى. ول بۇلاردىڭ 29-ن نوكاۋتپەن ءبىتىردى. ءسويتىپ, اتاقتى مايك تايسوننىڭ نوكاۋت سانى جونىندەگى رەكوردىن قايتالادى. جارايسىڭ, گەنا! رۋسلان يگىلىك. دەرەك: egemen.kz. فوتو: «ۆكونتاكتە».