بايقاۋدىڭ باستى ماقساتى – باس قالاداعى تازالىق پەن ءتارتىپتى قامتاماسىز ەتىپ جۇرگەن كوممۋنالدىق سالا قىزمەتكەرلەرىنىڭ ەڭبەگىن ناسيحاتتاۋ, جۇمىسشى ماماندىقتارىنىڭ مارتەبەسىن ارتتىرۋعا, سونداي-اق ەلوردانىڭ, ونىڭ شەت ايماقتارى مەن ەلدى مەكەندەرىنىڭ سانيتارلىق جاعدايىن قامتاماسىز ەتۋ تاقىرىبىن اشىپ جازۋ, كورسەتۋ. بايقاۋدىڭ تالابى بويىنشا, جۋرناليستەر مەن بلوگەرلەر 1 قاراشا مەن 10 جەلتوقسان ارالىعىندا باق قۇرالدارىندا نەمەسە الەۋمەتتىك جەلىدە جاريالاعان ماتەريالدارىن ۇسىندى. جالپى, ۇيىمداستىرۋشىلار القاسىنا 122 جۋرناليست پەن بلوگەر قالا تازالىعىنا جاۋاپتى مامانداردىڭ اق ادال ەڭبەگىن پاش ەتكەن 150-دەن استام ماتەريال جولداعان ەكەن.
بايقاۋ جۇلدەگەرلەرىن ماراپاتتاۋ راسىمىندە «استانا تازالىق» جشس باس ديرەكتورى زامير ساعىنوۆ:
– جۇمىسشى ماماندىقتار جىلىندا ەڭبەك ادامدارىنىڭ جۇمىسىن ناسيحاتتاۋ – جالپى قوعامنىڭ مىندەتى دەپ بىلەمىز. سونىڭ ىشىندە قالانىڭ كۇل-قوقىسىن جيناپ, سىرتقا شىعارىپ, كوشەلەردى, جولداردى, الاڭداردى, تروتۋارلار مەن باسقا دا قوعامدىق ورىنداردى تازالاپ, كۇن-ءتۇن دەمەي قوعام ءۇشىن ەڭبەك ەتەتىن قاراپايىم جۇمىسشىلاردى ۇلگى ەتىپ جۇرگەن ازاماتتارعا العىس ايتامىز. جىل باسىنان بەرى «استانا تازالىق» سەرىكتەستىگى تۋرالى اقپارات كەڭىستىگىندە 487 ماتەريال جارىق كورىپتى. سونىڭ 370-ءى قاراپايىم قىزمەتكەرلەر تۋرالى ەكەن. ياعني باق وكىلدەرى كۇن سايىن كەمى ءبىر جۇمىسشىنىڭ ەڭبەگىن ەلگە كورسەتىپ وتىردى دەگەن ءسوز. بۇل – ۇلكەن ەڭبەك», – دەپ اتاپ ءوتتى.
بايقاۋعا ۇسىنىلعان جۇمىستاردى سارالاپ, جەڭىمپازداردى انىقتاۋ ماقساتىندا تاۋەلسىز كوميسسيا قۇرىلعان. كوميسسيا مۇشەلەرىنىڭ شەشىمىمەن «باسپا باسىلىمىنداعى ۇزدىك ماقالا», «ۇزدىك تەلەۆيزيالىق ماتەريال», «الەۋمەتتىك جەلىلەردەگى ۇزدىك جاريالانىم», «ينتەرنەت-باسىلىمداعى ۇزدىك جاريالانىم» اتالىمدارى بويىنشا ۇزدىكتەر انىقتالدى. جۇلدە العان جۋرناليستەردىڭ قاتارىندا گازەتىمىزدىڭ الەۋمەت جانە سپورت ءبولىمىنىڭ ءتىلشىسى ساندىبەك ءاسانالى دە بار. ارىپتەسىمىز «باسپا باسىلىمىنداعى ۇزدىك ماقالا» اتالىمىندا جۇلدەگەر اتاندى. سونىمەن قاتار «كازاحستانسكايا پراۆدا» گازەتىنىڭ ءبولىم رەداكتورى اسەل مۇقانوۆا ارنايى سىيلىققا يە بولدى.
