«قازاقستان رەسپۋبليكاسى پرەزيدەنتىنىڭ قۇرمەت گراموتاسى حالىق قاھارمانى, «قارۋلى كۇشتەر ارداگەرلەرى» رەسپۋبليكالىق قوعامدىق بىرلەستىگىنىڭ توراعاسى, ارميا گەنەرالى مۇحتار قاپاش ۇلى التىنباەۆقا قازاقستاننىڭ قارۋلى كۇشتەرىن قالىپتاستىرۋعا, ەلىمىزدىڭ قورعانىسى مەن قاۋىپسىزدىگىن نىعايتۋعا قوسقان ۇزاق جىلعى قاجىرلى ەڭبەگى جانە جاستارعا اسكەري-پاتريوتتىق تاربيە بەرۋدەگى بەلسەندى قوعامدىق قىزمەتى ءۇشىن تاپسىرىلدى», دەلىنگەن گراموتادا.
ماۋلەن اشىمباەۆ ءوز سوزىندە ەل-جۇرت مۇحتار التىنباەۆتى تاۋەلسىز قازاقستاننىڭ قورعانىس جۇيەسىن قالىپتاستىرۋعا ۇلكەن ۇلەس قوسقان كورنەكتى مەملەكەت قايراتكەرى, ارميا گەنەرالى رەتىندە ەرەكشە قۇرمەتتەيتىنىن اتاپ ءوتتى. ول مۇحتار قاپاش ۇلىنىڭ باسشىلىعىمەن ەلىمىزدىڭ قارۋلى كۇشتەرىن جاڭعىرتۋ, حالىقارالىق اسكەري ىنتىماقتاستىقتى جولعا قويۋ, كاسىبي ارميا قالىپتاستىرۋ باعىتىندا اۋقىمدى جۇمىس اتقارىلعانىن ايتتى. سونداي-اق قايراتكەردىڭ ەڭبەك جولى پارلامەنتاريزم ينستيتۋتىمەن دە تىعىز بايلانىستى ەكەنىنە ءمان بەرىلدى.
«مۇحتار قاپاش ۇلىنىڭ ەل دامۋىنا قوسقان ۇلەسى اسكەري قىزمەتپەن شەكتەلمەيدى. ول سەنات دەپۋتاتى بولا ءجۇرىپ, مەملەكەتتىلىكتى نىعايتۋعا, قوعامدى دامىتۋعا ارنالعان زاڭداردىڭ قابىلدانۋىنا بەلسەندى اتسالىستى. بۇگىندە مۇحتار التىنباەۆ «قارۋلى كۇشتەر ارداگەرلەرى» ۇيىمىن باسقارىپ, ءومىرىن ەلدى قورعاۋعا ارناعان ازاماتتارعا قولداۋ كورسەتىپ كەلەدى. سونىمەن قاتار سەناتورلار كەڭەسىنىڭ مۇشەسى رەتىندەگى بەلسەندىلىگىن دە ەرەكشە اتاپ وتكەن ءجون», دەپ م.اشىمباەۆ مەرەيتوي يەسىنە زور دەنساۋلىق جانە باق-بەرەكە تىلەدى.
ءىس-شارا بارىسىندا مۇحتار التىنباەۆتى ارىپتەستەرى, سەناتورلار كەڭەسىنىڭ مۇشەلەرى, قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى, اسكەري قىزمەتتەگى دوستارى قۇتتىقتاپ, جىلى لەبىزدەرىن ءبىلدىردى.
