اقپاراتتا جابايى جانۋارلار قاراسۋىق اۋدانىنداعى كولدەردە قاتقان جالتىر مۇزدان وتە الماي, توپ-توبىمەن قىرىلىپ قالعانى ايتىلادى. جەرگىلىكتى تابيعات قورعاۋ ۆەدومستۆوسى مۇزدى كولدەردىڭ بىرىندە جانۋارلاردى قۇتقارۋ جونىندەگى «كۇردەلى جانە اۋقىمدى وپەراتسيانى» ينسپەكتورلار اڭشىلارمەن بىرلەسىپ جۇرگىزدى دەپ مالىمدەگەن. ايتسە دە ولار جۇزدەگەن جانۋار قىرىلىپ قالدى دەگەن اقپارات دۇرىس ەمەس دەيدى. ال قاراسۋلىق تۇرعىندار ينسپەكتورلار ەلىكتەردى قۇتقارعانىمەن, جاعاعا لاقتىرىپ تاستاپ جاتقاندارىنا قىنجىلىس تانىتىپ وتىر. شىن مانىندە جانۋارلاردىڭ بويىن جىلىتىپ, سوسىن بوساتۋ كەرەك ەكەنىن العا تارتادى.
ءنوۆوسىبىر وبلىسىنىڭ قاراسۋىق اۋدانى پاۆلودار وبلىسىنىڭ تەرەڭكول, ۋسپەن اۋداندارىمەن شەكارالاس. قوس مەملەكەتتىڭ بۇل اۋماقتاعى شەكاراسىندا قاراسۋىق, شاعان كولدەرى ورنالاسقان. رەسەيدىڭ ىشكى جاعىنان اۋا باستاعان ءتۇز تاعىلارى اتالعان سۋ ايدىندارىن باسىپ ءوتۋى ىقتيمال.
پاۆلودار وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ وكىلدەرى شەكارالىق ايماقتاردا ەلىكتەردىڭ قىرىلۋى تۋرالى اقپارات تۇسپەگەنىن حابارلادى.
«قازىرگى ۋاقىتتا ءسىبىر ەلىكتەرىندە كۇيەككە ءتۇسۋ مەزگىلى باستالدى. جابايى جانۋارلار شاعىلىسۋعا قولايلى جەر ىزدەپ, ميگراتسيا جاسايدى. ەلىكتەردىڭ شوعىرلانىپ, توپ-توبىمەن كوشىپ-قونۋى تۋرالى مالىمەتتەر بار. تەك پاۆلودار وبلىسىندا عانا ەمەس, قاراعاندى وڭىرىندە ەلىكتەردىڭ شوعىرلانۋى تىركەلگەنىن ارىپتەستەرىمىز ايتىپ وتىر. بۇل – ۋاقىتشا قۇبىلىس. بىراق جانۋارلاردىڭ ءولۋى تۋرالى اقپارات جوق. قازىر ءبىز جەرگىلىكتى ورمان شارۋاشىلىقتارىنان ەلىكتەردىڭ قوزعالىسى مەن تۇرىپ قالۋىنا قاتىستى مالىمەتتەر جيناپ جاتىرمىز. ونىڭ ناتيجەسى ەكى-ءۇش كۇندە بەلگىلى بولادى», دەيدى وڭىرلىك ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى يساتاي ابدرازاحوۆ.
قار قالىڭ تۇسكەن جىلدارى ەلىكتەر ەلدى مەكەندەردى, سونىڭ ىشىندە پاۆلودار قالاسىن ءجيى جاعالاپ, ازىق ىزدەيدى. ەرتىس وزەنىنىڭ جايىلماسىنداعى تابيعي قاۋمالدا اڭشىلىق جاساۋعا تىيىم سالىنعان. مامانداردىڭ ايتۋىنشا, ەلىكتەر كوبىنە وزەن بويىنداعى توعايلار اراسىن مەكەندەيدى. اشىق الاڭقايلاردا, ويپاڭ جەرلەردە قار قالىڭ تۇسسە, تەبىندەۋىنە كەدەرگى كەلتىرۋى مۇمكىن. 2023, 2024 جىلدارى جانۋارلاردىڭ ادامداردان قورىقپاي, قالا كوشەلەرىن كەزىپ كەتەتىنى ءجيى تىركەلگەن.
ەلىكتىڭ سانى دا جىل وتكەن سايىن ءوسىپ كەلەدى. 2023 جىلدىڭ كۇزىندە ولاردىڭ سانى 4200-دەي بولسا, رەسمي مالىمەتتەرگە سايكەس, قازىر پاۆلودار وبلىسىنىڭ اۋماعىندا شامامەن 4800-دەي ەلىك بار. اڭشىلىققا تىيىم سالىنعانى سەبەپتى, ەلىكتەر, وزگە دە ءتۇز تاعىلارى ەركىنسىپ, اۋىل-قالالارعا ءجيى كەلگىشتەيدى.
پاۆلودار وبلىسى
