«زاڭ جانە ءتارتىپ» تۇجىرىمداماسى اياسىندا ماڭىزدى الەۋمەتتىك اكتسيا ءوتتى. ءبىزدىڭ ورتاق ماقساتىمىز – ەسەپتە تۇرعان ازاماتتارعا ناقتى قولداۋ كورسەتىپ, ولاردىڭ زاڭعا باعىناتىن ءارى تۇراقتى ومىرگە قايتا ورالۋىنا جاعداي جاساۋ. ءبىز قايتا قۇقىق بۇزۋشىلىقتىڭ الدىن الۋدا ەڭبەكپەن قامتۋ نەگىزگى فاكتور ەكەندىگىن تۇسىنەمىز. سوندىقتان ءبىر الاڭدا بيزنەس وكىلدەرى مەن جۇمىسپەن قامتۋ قىزمەتى جينالىپ, جۇمىس ورىندارىن, تەگىن وقىتۋ مۇمكىندىكتەرى مەن كاسىبي كەڭەستەر ۇسىندى. ءاربىر قاتىسۋشىعا ءوز تاعدىرىن وزگەرتۋگە مۇمكىندىك بەرىلىپ وتىر», دەدى استانا قالاسى پروكۋراتۋراسى باسقارماسىنىڭ اعا پروكۋرورى نۇرتاس دۇيسەمباەۆ.
ماماندار پروباتسيا قىزمەتىنىڭ ەسەبىندە تۇرعان ادامداردىڭ قارجىلىق ماسەلەلەرى مەن نەسيەلىك جۇكتەمەلەرىن نازارعا الدى. زاڭگەرلەر مەن سوت ورىنداۋشىلار ازاماتتارعا بەرەشەكتەرىن رەتتەۋگە, كۇردەلى جاعدايلاردى زاڭدى جولمەن شەشۋگە كومەك بەردى. سونىمەن قاتار جيىندا مەديتسينالىق بلوك جۇمىس ىستەدى. مۇندا قاتىسۋشىلار دارىگەرلەردىڭ كەڭەسىن الدى. بۇدان بولەك, قاتىسۋشىلار ەلەكتروندىق ۇكىمەت پورتالىندا تىركەلۋ, مەملەكەتتىك قىزمەتتەردى, ونىڭ ىشىندە قۇجاتتاندىرۋ ماسەلەسى بويىنشا قىزمەتتەردى حقكو-عا بارماي-اق سول جەردە الا الدى.
«بۇل اكتسيا – پروكۋراتۋرامەن مەملەكەتتىك ورگاندار جۇرگىزىپ وتىرعان جۇيەلى جۇمىستىڭ ءبىر بولىگى. ءبىز «زاڭ جانە ءتارتىپ» ءار ازاماتتان باستالاتىنىنا سەنەمىز. ال ءبىزدىڭ مىندەت – ادامنىڭ جاڭا بولاشاققا نىق قادام جاساۋىنا مۇمكىندىك بەرەتىن جاعداي جاساۋ», دەدى اعا پروكۋرور.
پروكۋراتۋرا وكىلىنىڭ ايتۋىنشا, قازىر استانادا 2500-دەن استام ادام پروباتسيا قىزمەتىندە ەسەپتە تۇر. ولاردىڭ كوپشىلىگى – 25-35 جاس ارالىعىنداعى ازاماتتار.
«وسى الەۋمەتتىك اكتسياعا 25 جۇمىس بەرۋشى قاتىستى. ولار 300-گە جۋىق بوس جۇمىس ورنىن ۇسىندى. ولاردىڭ قاتارىندا سانتەحنيك, تىگىنشى, ەلەكتريك سەكىلدى بىرنەشە جۇمىستار بار», دەدى استانا قالاسى اكىمدىگى ەڭبەك موبيلدىلىگى ورتالىعىنىڭ ديرەكتورى ولجاس ومار.
