پولشاداعى سايلاۋ: exit poll مالىمەتى بويىنشا ەكىنشى تۋر بولادى

استانا. 11 مامىر. پولشادا كەشە, جەكسەنبى كۇنى وتكەن پرەزيدەنت سايلاۋى, exit poll مالىمەتتەرى بويىنشا, ەكىنشى تۋرعا اۋىساتىن بولىپ وتىر. بۇل تۋرالى تاسس حابارلادى. ءبىرىنشى تۋردا كۇتپەگەن جەردەن «قۇقىق جانە ادىلدىك» پارتياسىنان مەملەكەت باسشىلىعىنا تالاسىپ جاتقان اندجەي دۋدا ءىس باسىنداعى پرەزيدەنت برونيسلاۆ كوموروۆسكيدەن ءسال عانا باسىمدىقپەن جەڭىسكە جەتتى. بىراق ۇمىتكەرلەردىڭ بىردە-ءبىرى 50 پايىزدان جوعارى داۋىس الا العان جوق. پرەزيدەنت سايلاۋىنىڭ ەكىنشى تۋرى ەندى 24 مامىر كۇنى وتەدى. ال IPSOS زەرتتەۋ ورتالىعىنىڭ exit poll مالىمەتى بويىنشا, جەكسەنبى كۇنى سايلاۋشىلاردىڭ 34,8 پايىزى اندجەي دۋداعا, 32,2 پايىزى برونيسلاۆ كوموروۆسكيگە داۋىس بەرگەن. ساراپشىلار exit poll ناتيجەسى اندجەي دۋدانى پولشا پرەزيدەنتتىگىنە كانديدات ەتىپ ۇسىنعان ياروسلاۆ كاچينسكيدىڭ «قۇقىق جانە ادىلەتتىلىك» پارتياسى شتابىندا ناعىز ساياسي سەنساتسيا رەتىندە قابىلدانىپ, ۇلكەن قۋانىش تۋعىزىپ جاتقانىن ايتىپ وتىر. سول سياقتى تاۋەلسىز كانديدات پاۆەل كۋكيزدىڭ 20,3 پايىز داۋىس العانى تاعى ءبىر سەنساتسيا سانالۋدا. بۇدان ءارى يانۋش كرۆين-ميككە – 4,4, ماگدالەنا وگۋرەك 2,4 پايىزبەن كەلەدى. مۇرات ايتقوجا. دەرەك, سۋرەت: ريا نوۆوستي.