قانات يسلامنىڭ كەلەسى ۇرىسى وتەتىن كۇن انىقتالدى

استانا. 21 اقپان. قازاقستاندىق كاسىپقوي بوكسشى قانات يسلامنىڭ دەمەۋشىسى, مەتسەنات باۋىرجان وسپانوۆ اتلەتتىڭ كەلەسى جەكپە-جەگى وتەتىن ۋاقىتىنىڭ بەلگىلى بولعانىن ايتتى. بۇل تۋرالى Vesti.kz حابارلادى. «قازىر قانات يسلام امەريكادا جاتتىعىپ جاتىر. ونىڭ كەلەسى جەكپە-جەگى 23 ناۋرىز كۇنىنە بەلگىلەندى. بىراق ازىرگە قارسىلاسىنىڭ كىم بولاتىنى بەلگىسىز. ول WBC بوكس ۇيىمى رەيتينگىنىڭ جوعارى ورنىندا تۇر. ەندى ءبىر جەكپە-جەكتى ءساتتى وتكىزسە, ۇزدىكتەر بەستىگىنە كىرەدى. سپورتشى مەن ونىڭ كومانداسىندا ەشقانداي قارجىلىق پروبلەما جوق», - دەدى وسپانوۆ. ايتا كەتەيىك, جەكپە-جەك دومينيكان رەسپۋبليكاسىندا, كولۋمبيادا نەمەسە اقش-تا ءوتۋى مۇمكىن. قانات يسلام كاسىپقوي الاڭداعى جەكپە-جەكتەرىنىڭ بارلىعىن ەكۆادور, كولۋمبيا جانە دومينيكان رەسپۋبليكاسى ەلدەرىندە وتكىزىپ كەلدى. الايدا, ونىڭ پروموۋتەرى كىشى نەلسون لوپەس قاناتتىڭ كەلەسى جەكپە-جەگى قازاقستاندا ءوتۋى مۇمكىن ەكەنىن بىرنەشە رەت مالىمدەدى. بۇگىندە جاسى 30-عا كەلگەن قانات يسلام كاسىپقوي رينگتە 18 رەت ۇرىس وتكىزىپ قويدى. ول WBA Fedelatin اتاعىنىڭ جەڭىمپازى. بۇعان دەيىن قاناتپەن ارگەنتينالىق گۋيدو نيكولاس پيتتو جۇدىرىقتاساتىن بولىپ شەشىلىپ ەدى, بىراق كەيىن ۇرىستىڭ بولمايتىنى حابارلاندى. دامير قوجامقۇل.