فوتو: اشىق دەرەككوز
ەندى قولدانۋشىلار ChatGPT ينتەرفەيسىندە-اق رەتسەپت تاڭداۋدان باستاپ, ازىق-ت ۇلىك ءتىزىمىن قۇراستىرىپ, تاپسىرىستى راسىمدەۋگە دەيىنگى بارلىق ارەكەتتى ورىنداي الادى.
كومپانيالار بۇرىن دا ارىپتەستىك ورناتقان: ەكى جىل بۇرىن Instacart ءوز قوسىمشاسىنا ChatGPT نەگىزىندەگى ىزدەۋ جۇيەسىن ەنگىزگەن بولاتىن. سول ارقىلى پايدالانۋشىلار كەشكى اسقا نە دايىنداۋ كەرەك ەكەنىن نەمەسە ديەتاعا ساي ءمازىر تاڭداۋدى سۇراي الاتىن ەدى.
ينتەگراتسيانىڭ ودان ءارى كۇشەيۋىنە Instacart-تىڭ بۇرىنعى باس ديرەكتورى فيدجي سيمونىڭ OpenAI-عا اۋىسۋى اسەر ەتتى. ول بيىل مامىردا كومپانيانىڭ تسيفرلىق ونىمدەر باعىتىن باسقارۋعا كىرىسكەن.
OpenAI ءۇشىن بۇل — قاراپايىم ەكسپەريمەنت ەمەس, ستراتەگيالىق باعىت. كومپانيا جاڭا مودەلگە بەت بۇردى: جاساندى ينتەللەكت ەندى تەك كەڭەس بەرىپ قانا قويمايدى, پايدالانۋشى ءۇشىن ناقتى ارەكەتتەر جاسايدى, تاۋارلاردى ىزدەيدى, سالىستىرادى جانە تاپسىرىستى اۆتوماتتى تۇردە راسىمدەيدى.
وسىعان دەيىن OpenAI ChatGPT-ءدى Booking.com, Canva, Coursera سياقتى سەرۆيستەرمەن بىرىكتىرگەن. كەيىن Target, Intuit جانە باسقا دا ءىرى كومپانيالارمەن سەرىكتەستىك ورناتىلدى.
مەرەكەلىك ماۋسىم قارساڭىندا OpenAI جانە Perplexity قولدانۋشىلارعا تىكەلەي قوسىمشا ىشىندە تاۋار تاڭداۋ مۇمكىندىگىن كەڭەيتتى. مىسالى, ChatGPT-دەن بەرىلگەن بيۋدجەت پەن پارامەترلەرگە ساي ەڭ جاقسى نوۋتبۋكتى تابۋدى سۇراۋعا بولادى. Adobe ساراپشىلارى جي-كومەكتى ونلاين-شوپينگ كولەمى وسى قىستا 520% وسەدى دەپ بولجاپ وتىر.
جاڭا ساۋدا ينتەگراتسيالارى كومپانياعا الەۋەتتى تابىس كوزىن اشادى: ChatGPT ارقىلى راسىمدەلگەن ءار ساتىپ الۋدان OpenAI شاعىن كوميسسيا الادى. الايدا ساراپشىلاردىڭ پىكىرىنشە, كومپانيا شىعىندارىنىڭ كولەمىن ەسكەرسەك, بۇل كوميسسيالار قارجىلىق بالانسىنا ايتارلىقتاي اسەر ەتۋى ءۇشىن ترانزاكتسيالار سانى وتە كوپ بولۋى ءتيىس.
