فوتو: اشىق دەرەككوز
مامانداردىڭ دەرەگىنشە, جالعان بروكەرلەر تەك ينۆەستيتسيا يلليۋزياسىن جاساپ, ازاماتتاردىڭ قاراجاتىن الداپ الىپ, كەيىن ءىزىن جاسىرادى. ولار تانىمال ادامداردىڭ ديپفەيكتەرىن پايدالانىپ, قىسقا ۋاقىت ىشىندە جوعارى تابىسقا سەندىرەتىن اگرەسسيۆتى جارنامانى قولدانادى.
كليەنت بايلانىس ءنومىرىن قالدىرعاننان كەيىن «مەنەدجەرلەر» اسىعىستىق تۋعىزۋ تاكتيكاسىن قولدانادى: «اكتسيا اياقتالۋعا جاقىن», «قازاقستان ءۇشىن ليميت شەكتەۋلى» دەگەن سياقتى قىسىم كورسەتەدى.
الاياقتار زاڭدى بروكەرلەردىڭ سايتتارىن اينىتپاي جاسايتىن كلوندار نەمەسە «ينۆەستيتسيالىق پلاتفورمالار» اشادى. وندا پايدالانۋشى تەك جالعان, ۆيرتۋالدى تابىستىڭ ءوسىپ جاتقان گرافيگىن كورەدى. قاراجاتتى شەشىپ الۋعا ارەكەت جاساعاندا كليەنتتەن كوميسسيا, ساقتاندىرۋ, «ستاتۋس كوتەرۋ» سياقتى جەلەۋلەرمەن قوسىمشا اقشا تالاپ ەتىلەدى. ماكسيمالدى سومانى العاننان كەيىن الاياقتار جوعالىپ كەتەدى, سايتتار وشىرىلەدى, قاراجات شەتەلدىك نەمەسە جالعان تۇلعالاردىڭ شوتتارىنا تۇسەدى.
قازاقستاندا كەڭ تاراعان سحەمالار
• جالعان IPO. ءىرى كومپانيالاردىڭ بيرجاعا دەيىنگى «جابىق اكتسيالارىن» ۇسىنۋ. 2021 جىلى اقتوبە وبلىسىندا Nike, Microsoft جانە Pepsi اكتسيالارىنىڭ جالعان ساۋداسى اشىلعان. مينيمالدى سالىم – 1 000 دوللار.
• Instagram جانە Telegram-داعى جالعان «ينۆەستيتسيالىق جەلىلەر». ايىنا 30-50% تابىس ۋادە ەتىپ, قاراجاتتى «كۋراتوردىڭ» جەكە كارتاسىنا اۋدارتقان. 2025 جىلعى قازاندا قارجىلىق مونيتورينگ اگەنتتىگى 100% تابىس ۇسىنعان سحەمانى توقتاتتى. 117 ادام زارداپ شەككەن.
• «پەرسپەكتيۆالى توكەندەر» مەن «اربيتراج ارقىلى تابىس». قاراجاتتى الاياقتار شوتىنا تولىقتىرۋ عانا تالاپ ەتىلەدى. 2025 جىلدىڭ قاراشاسىندا Warner Bros.-پەن ارىپتەستىك رەتىندە كورسەتىلگەن قارجى پيراميداسىنىڭ ۇيىمداستىرۋشىسى 5 جىلعا سوتتالدى. 40 ادام ورتا ەسەپپەن 225 مىڭ تەڭگەدەن ايىرىلعان.
قالاي قورعانۋعا بولادى
-
قازاقستانداعى كەز كەلگەن كاسىبي باعالى قاعازدار نارىعى قاتىسۋشىسىنىڭ مىندەتتى ليتسەنزياسى بولۋى شارت.
-
گارانتتالعان تابىسقا سەنبەۋ كەرەك. جوعارى پايدا ارقاشان جوعارى تاۋەكەلمەن بايلانىستى.
-
اقشانى جەكە تۇلعالارعا اۋدارماۋ جانە بەلگىسىز قوسىمشالاردى «مەنەدجەردىڭ وتىنىشىمەن» ورناتپاۋ.
-
كومپانيانىڭ رەكۆيزيتتەرى مەن رەسمي كەلىسىمشارتتى تالاپ ەتۋ.
