فوتو: © freepik.com
بۇل باستاما ەلدەگى اتوم ەنەرگەتيكاسىنىڭ بولاشاعىن قامتاماسىز ەتەتىن ينجەنەرلىك, تەحنيكالىق پەن عىلىمي باعىتتار بويىنشا جوعارى بىلىكتى ماماندار دايارلاۋعا جول اشادى. مەملەكەتتىك ءارى سالالىق نەگىزگى ينستيتۋتتاردىڭ بىرلەسىپ قاتىسۋى ادامي كاپيتالدى دامىتۋدىڭ كەشەندى ءتاسىلىن قالىپتاستىرىپ, بولاشاق اتوم جوبالارى ءۇشىن ساپالى كادرلىق بازا قۇرۋعا مۇمكىندىك بەرەدى.
جاڭا باعدارلاما اياسىندا 2026 جىلى «بولاشاق» حالىقارالىق باعدارلاماسى بويىنشا پيلوتتىق رەجيمدە 20 گرانت ءبولۋ جوسپارلانىپ وتىر. الداعى جىلدارى مۇنداي گرانتتار جىل سايىن تۇراقتى تۇردە ۇسىنىلادى. وقۋ حالىقارالىق تاعىلىمدامالاردى, سونداي-اق شەتەلدىڭ جەتەكشى ۋنيۆەرسيتەتتەرىندەگى ماگيستراتۋرا مەن دوكتورانتۋرا باعدارلامالارىن قامتيدى.
جوبانىڭ نەگىزگى ماقساتى – اتوم تەحنولوگيالارىن قاۋىپسىز ەنگىزە الاتىن, عىلىمي-تەحنيكالىق پروگرەستى العا باستايتىن جاڭا بۋىن ينجەنەرلەر مەن عالىمداردى دايارلاۋ. ەلدىڭ اتوم ەنەرگەتيكاسى جونىندەگى اگەنتتىگىنىڭ توراعاسى الماسادام ساتقاليەۆتىڭ ايتۋىنشا, بۇل باستاما مەملەكەت باسشىسىنىڭ زاماناۋي ەنەرگەتيكالىق كلاستەر قالىپتاستىرۋ جونىندەگى تاپسىرماسىنا تولىق سايكەس كەلەدى.
ء«بولىنىپ وتىرعان گرانتتار – بۇل سالانىڭ بولاشاعىن قالىپتاستىراتىن ادامدارعا جاسالعان ينۆەستيتسيا. ءدال وسى ماماندار اتوم ەنەرگەتيكاسىنىڭ ورنىقتىلىعىن ارتتىرىپ, حالىقارالىق باسەكەگە قابىلەتتىلىگىن كۇشەيتەدى», دەدى اگەنتتىك توراعاسى.
ساراپشىلاردىڭ پىكىرىنشە, باعدارلامانىڭ ىسكە قوسىلۋى ەلدىڭ عىلىمي-تەحنيكالىق الەۋەتىن نىعايتىپ, اتوم ەنەرگەتيكاسى سالاسىندا مىقتى ءارى ۇزاق مەرزىمدى كادرلىق نەگىز قالىپتاستىرۋعا سەرپىن بەرەدى. بۇل ءوز كەزەگىندە ەلدىڭ ەنەرگەتيكالىق قاۋىپسىزدىگى مەن جوعارى تەحنولوگيالى ەكونوميكا قۇرۋ جولىنداعى ستراتەگيالىق ماقساتتارىنا قىزمەت ەتەدى.
