فوتو: polisia.kz
الماتى پوليتسيا دەپارتامەنتىنىڭ مالىمەتىنشە, كەشكى ساعات 20:00-دەن بۇگىن تاڭعى 06:00-گە دەيىن 58 جول-كولىك وقيعاسى تىركەلگەن. سالدارىنان 9 ادام جاراقات الدى, قازا بولعاندار جوق.
پوليتسيا كۇشەيتىلگەن رەجيمدە جۇمىس ىستەپ, جول قاۋىپسىزدىگىنە ەرەكشە نازار اۋدارىپ وتىر. پاترۋلدىك پوليتسيا ەكيپاجدارى بارلىق شاقىرتۋلارعا جەدەل ارەكەت ەتىپ, جول-كولىك وقيعالارىن رەسىمدەۋدى قامتاماسىز ەتىپ جاتىر. سونداي-اق كوشەلەردى تازالاۋ جانە جول جابىندىسىن وڭدەۋ جۇمىستارىنا جۇمىلدىرىلعان كوممۋنالدىق قىزمەتتەرگە كومەك كورسەتۋدە.
«العاشقى قار – جول قوزعالىسى ءۇشىن ءاردايىم سىناق. ءبىز جۇرگىزۋشىلەردى بارىنشا ساق بولۋعا, قاشىقتىقتى جانە جىلدامدىق رەجيمىن ساقتاۋعا شاقىرامىز. كولىكتى قىس ماۋسىمىنا الدىن الا دايىنداۋ وتە ماڭىزدى: شينالاردى اۋىستىرىپ, تەحنيكالىق جاعدايىن تەكسەرۋ قاجەت. ەگەر اۆتوموبيل قىسقى جاعدايعا دايىن بولماسا, جولعا شىقپاعان ءجون. ءبىزدىڭ باستى مىندەتىمىز – جۇرگىزۋشىلەردىڭ قاۋىپسىزدىگىن ساقتاۋ», دەدى الماتى قالاسى پد اكىمشىلىك پوليتسيا باسقارماسىنىڭ باستىعى سەرىك شۇماەۆ.
الماتى پوليتسيا دەپارتامەنتى قالا تۇرعىندارىن جولدا بارىنشا ساق بولۋعا, قىسقى جاعدايدى ەسكەرۋگە جانە جول قوزعالىسى ەرەجەلەرىن بۇلجىتپاي ساقتاۋعا شاقىرادى.
ايتا كەتەيىك, بۇعان دەيىن الماتى قالاسىندا بىر تۇندە جارتى ايدىڭ نورماسىنداي قار جاۋىپ تاستاعانىن حابارلاعان ەدىك. قاردىڭ قالىڭدىعى 35 سانتيمەترگە دەيىن جەتكەن.
