گرەك-ريم كۇرەسى. نۇرماحان تىناليەۆ – ەكى دۇركىن ازيا چەمپيونى!

استانا. 11 مامىر. كاتار استاناسى – دوحادا ءوتىپ جاتقان كۇرەس تۇرلەرىنەن ازيا چەمپيوناتىندا قازاقستان قورجىنىنا تاعى ءبىر التىن مەدال ءتۇستى. بۇل جولى گرەك-ريم كۇرەسىنەن نۇرماحان تىناليەۆ (130 كگ.) قۇرلىق چەمپيونى اتاندى. بۇل تۋرالى سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ رەسمي سايتى confederation.kz حابارلادى. نۇرماحان تىناليەۆ العاشقى بەلدەسۋىندە يراك پالۋانى حايدەر كاابيدى جەڭسە, شيرەك فينالدا ءۇندىستان سەنىم ارتقان ناۆين ناۆيننەن باسىم ءتۇستى. ال جارتىلاي فينالدا يراندىق باشير بابادجانزالەحتىڭ جاۋىرىنىن جەر يىسكەتتى. شەشۋشى سىندا قىتاي ەلىنىڭ وكىلى كيان مەندى الىپ ۇرىپ, ەكى دۇركىن ازيا چەمپيونى اتاندى. العاش رەت ول بىلتىر ءۇندىستان استاناسى – دەليدە وتكەن قۇرلىقتىق دودادا توپ جارعان بولاتىن. سونداي-اق, تۇيە پالۋانىمىزدىڭ ءۇش مارتە الەم چەمپيوناتىندا قولا جۇلدە الىپ, مەرەيىمىزدى تاسىتقانى ەسىمىزدە (ماسكەۋ, 2010 ج., ىستامبۇل, 2011 ج., بۋداپەشت, 2013 ج.). ودان بولەك, ەكى دۇركىن ازيا ويىندارىنىڭ چەمپيونى (گۋانجوۋ, 2010 ج., ينچحون, 2014 ج.). دوحاداعى سايىستا نۇرماحاننىڭ «التىنىنان» بولەك, گرەك-ريم كۇرەسىنىڭ پالۋاندارى قورجىنىمىزعا 1 كۇمىس جانە 3 قولا مەدال سالدى. كۇمىس جۇلدە نۇرسۇلتان تۇرسىنوۆتىڭ (85 كگ.) ەنشىسىنە جازىلسا, مارعۇلان اسەمباەۆ (98 كگ.), جاسۇلان قوشانوۆ (80 كگ.) جانە دەمەۋ جادراەۆ (66 كگ.) «قولاعا» قول جەتكىزدى. سونىمەن قاتار, اتالعان قۇرلىقتىق دودادا ەركىن كۇرەس جانە ايەلدەر كۇرەسىنەن دە ايتارلىقتاي ناتيجە كورسەتتىك. اتاپ ايتساق, ەركىن كۇرەستەن داۋلەت نيازبەكوۆ (61 كگ.) ازيا چەمپيونى اتاندى. ال ايەلدەر كۇرەسىندە ەلميرا سىزدىقوۆا (69 كگ.) – كۇمىس, جۇلدىز ءاشىموۆا (53 كگ.), ەكاتەرينا لاريونوۆا (63 كگ.) جانە گۇلمارال ەركەباەۆا (75 كگ.) قولا مەدالعا قول جەتكىزدى. ەلامان قوڭىر. دەرەك, سۋرەت: confederation.kz.