الماتىداعى پەدياتريا جانە بالالار حيرۋرگياسى عىلىمي ورتالىعىنىڭ ءبولىم مەڭگەرۋشىسى بولىپ جۇمىس ىستەيتىن كەزىم. كىشكەنتاي پاتسيەنت ايىم 2024 جىلعى 23 ساۋىردە الماتى وبلىسى قاراساي اۋدانىندا دۇنيەگە كەلگەن. تۋعان سوڭ ءبىر تاۋلىك وتەر-وتپەستەن جاعدايى ناشارلاي باستاعان. نارەستەنىڭ تىنىس الۋى قيىنداپ, ورتالىق جۇيكە جۇيەسىنىڭ دەپرەسسياسى, انەميا بەلگىلەرى بايقالعان. جەرگىلىكتى دارىگەرلەر وعان ارنايى كومەك قاجەت ەكەنىن بىردەن ءتۇسىنىپ, جانساقتاۋ بولىمىنە اۋىستىرادى. الايدا نارەستەنىڭ جاعدايى كۇننەن كۇنگە قيىنداپ بارا جاتقانىنان حاباردار اتا-انا پەرزەنتىن قالاي دا قالاداعى اۋرۋحاناعا اۋىستىرۋعا بەل بۋادى.
سول كۇنى ادەتتەگىدەي وپەراتسيادان شىعىپ, سمارتفونعا ءۇڭىلدىم. قاپتاعان حاتتاردىڭ اراسىنان «بۇگىن بولىمشەگە وتە اۋىر جاعدايدا ناۋقاس جەتكىزىلەدى» دەگەن حاباردى وقىدىم. كوپ ۇزاماي, 11.30 شاماسىندا پەدياتريا جانە بالالار حيرۋرگياسى عىلىمي ورتالىعىنىڭ بولىمشەسىنە كىشكەنتاي ايىم قابىلدانىپتى. بالانى قاراساي اۋدانىنان جەدەل جاردەم كولىگىمەن جەتكىزگەن دارىگەردىڭ ايتۋىنشا, نارەستەنىڭ ءحالى اۋىر. وسىنى ەسكەرىپ, ءار مينۋتتى ءتيىمدى پايدالانۋعا تىرىستىق. پالاتا دارىگەرى تەز ارادا دياگنوستيكا ماماندارىن شاقىردى. بۇلدىرشىنگە رەسپيراتورلىق, ينفۋزيالىق ەم تاعايىندادىق. قالعان ەمشارالاردى اناليز, زەرتتەۋلەردىڭ قورىتىندىسىنان كەيىن قوسامىز دەپ كەلىستىك. وسى ارالىقتا جوسپارلى وپەراتسيالارعا انەستەزيالىق كومەك كورسەتۋ ماقساتىندا وپەراتسيا بولمەسىنە تاعى كەتتىم. شامامەن ەكى ساعاتتان سوڭ جوسپارلاعان زەرتتەۋلەرىمىز, العان اناليزدەرىمىز دايىن بولدى. ناتيجە كوڭىل كونشىتەرلىك ەمەس. ترومبوتسيتتەردىڭ تومەن دەڭگەيى گەمورراگيالىق اسقىنۋلاردىڭ قاۋپىن ارتتىراتىندىقتان الاڭداي باستادىق. بيوحيميالىق قان اناليزىندە دە اۋىتقۋلار انىقتالدى. جۇرەكتى ۋزي جاساعاندا ەكى قارىنشانىڭ ايقىن گيپەرتروفياسى, وكپەلىك گيپەرتەنزيا, تومەنگى قۋىس تامىرىنىڭ جۇرەككە قۇيا بەرىسىندە ترومب انىقتالدى. سول ساراپتامالاردى باسشىلىققا الىپ بىردەن ەمشارا تاعايىندادىق. نەفرولوگ, كارديوحيرۋرگ, انگيوحيرۋرگ, نەۆروپاتولوگ, گەماتولوگ, كلينيكالىق فارماكولوگ ماماندارىمەن بىرگە كونسيليۋم جۇرگىزدىك. بارلىق الىنعان مالىمەتتەردى تالقىلاپ, نارەستەدە سەپسيس دياگنوزى, اعزانىڭ جۇيەلىك زاقىمدانۋى بايقالادى دەگەن قورىتىندىعا كەلدىك. قارقىندى ەممەن قاتار پەريتونەالدى ءدياليزدى قوسامىز دەپ شەشتىك. شىنىندا بىزگە شەشىم قابىلداۋ وتە قيىن بولدى. سەبەبى ءبىر ەمشارا ناۋقاس اعزاسىنداعى باسقا اسقىنۋلاردى قوزدىرۋى مۇمكىن.
جۇرگىزىپ جاتقان قارقىندى ەمگە قاراماستان, العاشقى ءۇش كۇن ناۋقاستىڭ جاعدايى ناشارلاي بەردى. ساعات سايىن ونىڭ جاعدايى قيىنداپ, سەپتيكالىق شوك تۋدى. بىزگە ءار مينۋت قىمبات ەدى. ءبىر ساتتە جاعداي ودان دا اۋىرلاپ, جۇرەك-قانتامىر جەتكىلىكسىزدىگى قوسىلدى. سالدارىنان ءبىر عانا ەمەس, ءۇش بىردەي كارديوتونيكالىق (نورادرەنالين, دوپامين, سيمداكس) ءدارىنى قولدانۋعا تۋرا كەلدى. جاعدايدىڭ اۋىرلىعىنا قاراماي, قولدان كەلگەنشە ارەكەت ەتە بەردىك. بەسىنشى كۇن دەگەندە ناۋقاستان وزگەرىستەردىڭ العاشقى بەلگىلەرىن بايقاي باستادىق. العاشقى كۇندەرى ەمشاراعا ارالاسقان ءاربىر دارىگەر, مەدبيكە وتپەن ويناعانداي كۇي كەشتى. بەسىنشى كۇننەن كەيىن دە جاعداي وڭالاتىنىنا ءجۇز پايىز سەنىمدى بولمادىق.
جەتىنشى كۇنى نارەستەنىڭ بەتى بەرى قاراي باستادى. ءزارى كوبەيىپ, ىسىنگەنى ازداپ باسىلدى. بۇل نارەستە اعزاسى سۋ بالانسىن ساقتاي باستادى دەگەن ءسوز. بىرنەشە كۇن بۇرىن اناليزدەردە بايقالعان ازوتتى شلاكتار ءبىرشاما ازايعان. سەگىزىنشى كۇن دەگەندە عانا ءبىزدىڭ كوڭىلىمىز ازداپ ورنىنا تۇسكەندەي بولدى. وسى كەزەڭدە ەكى كارديوتونيكالىق پرەپاراتتان بىرتىندەپ باس تارتۋدى شەشتىك. كەلەسى قاداممەن بالانىڭ ساناسىن تەكسەرەتىن «دەكسدور» دەپ اتالاتىن سەداتيۆتى پرەپاراتتى توقتاتتىق. بىرنەشە مينۋت كۇدىكتەن كەيىن بالانىڭ توڭىرەككە قاراي باستاعانىن بايقادىق. وسىدان سوڭ بالانى تىنىس الۋ اپپاراتىندا ءماجبۇرلى رەجىمنەن قولداۋشى رەجىمگە اۋىستىرۋدى ۇيعاردىق. نارەستەنى زوند ارقىلى قورەكتەندىرۋگە كوشتىك. بۇل بالانىڭ قالپىنا كەلۋ جولىندا ماڭىزدى كەزەڭ بولدى. سەبەبى تاماقتانۋ – ءومىر سۇرۋگە قاجەتتى ۇدەرىس, بالانىڭ قالپىنا كەلۋىنە ىقپال ەتەتىن باستى فاكتورلاردىڭ ءبىرى. ءاربىر تامشى ازىق زوند ارقىلى تۇسكەن سايىن بىزگە كىشىگىرىم جەڭىسپەن پارا-پار بولدى. ونىڭ ءاربىر قيمىلىن, وزگەرىسىن باقىلاپ, اعزاسى جاڭا جاعدايعا بەيىمدەلە باستاعانىن بايقاپ
وتىردىق.
ونىنشى كۇنى بالانىڭ ەس دەڭگەيى جاقساردى. كوزىن اشىپ, جان-جاعىنا قارادى. دەنەسىن بەلسەندى قوزعالتادى, اۋزىنداعى ەندوتراحەالدى تۇتىكتى سورادى. بۇل بەلگىلەر اعزاسى ومىرگە قايتا ورالا باستادى دەگەندى بىلدىرەدى. جاساندى تىنىس الۋ اپپاراتىنا تاۋەلدى بولماي, وزدىگىنەن تىنىس الا باستادى. گەموديناميكاسى دا رەتتەلدى, جۇرەكتى ىنتالاندىراتىن دارىلەردەن تولىقتاي ارىلدىق. جۇرەكتى ۋلترادىبىستى زەرتتەۋ كەزىندە ترومب كولەمىنىڭ نۇكتە سەكىلدى جوق بولعانىنا كوز جەتكىزدىك. شلاكتاردىڭ, ەلەكتروليتتەردىڭ, اقۋىزداردىڭ, باسقا دا ماڭىزدى كورسەتكىشتەردىڭ قالىپقا كەلگەنىن كورگەندە ەرەكشە قۋاندىق.
جانساقتاۋ بولىمىندەگى 12 كۇننەن سوڭ بالا جاعدايىن ەسكەرىپ, ونى نەوناتولوگيا بولىمىنە اۋىستىردىق. بۇل بولىمدە بالا تاعى بەس كۇن باقىلاۋدا بولدى. ءسابيدىڭ اتا-اناسى دارىگەرلەرگە العىسىن جاۋدىرىپ, تىلەك-لەبىزدەرىن جەتكىزدى. ولاردىڭ جىلى جۇزدەرىن كورىپ, ءبىزدىڭ موينىمىزدان اۋىر جۇك تۇسكەندەي بولدى. شىن قۋاندىق, بىراق كوڭىل بوساتا المادىق. سەبەبى سول ءسات دارىگەر كەلىپ, كەزەكتى تاعى ءبىر وپەراتسياعا كىرەتىن ۋاقىت تاياعانىن حابارلاعان ەدى.
نۇرسۇلتان قۇربانبەكوۆ,
№2 قالالىق كوپبەيىندى بالالار اۋرۋحاناسى انەستەزيولوگيا, رەانيماتولوگيا جانە قارقىندى تەراپيا ءبولىمىنىڭ مەڭگەرۋشىسى
استانا
